Nepal: Abasaga 2 200 bishwe n’umutingito

Nibura abantu 2 200 bamaze kumenyekana ko bapfuye nyuma y’umutingito ukomeye wajegeje igihugu cya Nepal, abayobozi baravuga ko hari ubwoba bwinshi bw’uko haba hakiri abandi benshi bakiri mu binonko.

Uyu mutingito ukase wibasiye umurwamukuru Kathmandu, ku gipimo cya magnitude 7,8 ndetse wanakoze ku mujyi wa Pokhara.

Umutingito wumvikanye no mu bihugu bituranyi nk’Ubuhinde, Bangladesh ndetse no ku musozi muremure wa Everest.

Minisitiri ushinzwe gutanga amakuru muri Nepal, Minendra Rijal yavuze ko ibintu bitagira ingano byangiritse aho uwo mutingito wageze.

Yagize ati “Turasaba ubufasha bw’imiryango mpuzamahanga itandukanye ifite ubushobozi bwo gutaba mu bihe byihutirwa nk’ibi turimo.”

Umuvugizi wa Pilisi muri icyo gihugu yatangarije BBC ko abantu 876 bamaze kumenyekana ko bitabye Imana.

Uyu mutingito wangije ibikorwaremezo byinshi n’ibijyanye n’itumanaho, umunara wubakiwe umwami witwa ‘Dharahara tower’ kamwe mu bice byasurwaga cyane na wo wirundumuriye hasi, ndetse n’inyubako Televiziyo y’igihugu yakoreragamo ngo yakozweho n’umutingito nk’ukoNew York Times cyabitangaje.

Nepal yigeze gukorwaho n’umutingito nk’uyu ukomeye mu 1934.

Imwe mu mitingito yabayeho ikaze cyane ku isi:

Igihugu cya Chili, mu 1960, umutingito wa magnitude 9,5 wateje ‘tsunami’, abantu basaga 1 700 bahasiga ubuzima.

Mu gace ka Alaska, mu mwaka wa 1964, umutingito ukomeye wa magnitude 9,2 wahitanye abantu 131.

Mu gihugu cya Indonesia, mu mwaka wa 2004, umutingito ukomeye ku gipimo cya magnitude 9,1 wateje tsunami, nibura abantu 230 000 bahasize ubuzima mu bihugu bigera ku 10 wagezemo.

Mu gihugu cy’Ubuyapani, mu mwaka wa 2011, umutingito ufite ubukana ku gipimo cya magnitude 9 wateje tsunami, uhitana abantu 18 000.

Igihugu cy’Uburusiya na cyo mu 1952, umutingito ufite magnitude 9 wangije ibintu byinshi ariko ntihavuzwe umubare w’abahasize ubuzima.

Iki gihugu cya Nepal, gituwe n’abaturage basaga miliyoni 27, kiri ku mugabane wa Aziya kituranye n’Ubuhindi, Ubushinwa ndetse na Bangladesh.

UM– USEKE.RW