Obama yasuye Inzu ndangamurage ya muzika ya Bob Marley

Mu rugendo arimo muri Jamaica Perezida Barack Obama yasuye inzu ndangamurage y’umuziki wa Bob Marley, icyamamare mu njyana ya Reggae ku Isi. Obama yatangaje ko nawe agitunze buri Album ya Bob Marley.

Obama muri uru ruzinduko yahise aba Perezida wa mbere ya USA usuye Jamaica mu myaka 33 ishize nyuma ya Ronald Reagan wahasuye mu 1982. Ku mugoroba wo kuri uyu wa 08 Mata, Obama yabonanye na Portia Simpson-Miller Minisitiri w’Intebe w’iki gihugu.

Mu ijoro cyane nibwo yasuye iyi nzu ya Bob Marley yabayemo kugeza yitabye Imana mu 1891, yayitambagijwemo yerekwa ibihembo Bob yegukanye ari nako mu nzu hose agenda yumva indirimbo “One Love” mu byuma birangururamajwi.

Iyi nzu iherereye Kingston mu murwa mukuru wa Jamaica

Abo mu muryango wa Bob iyi nzu yabagamo bayihinduye inzu ndangamurage irimo ibintu bitandukanye bya Bob Marley yakoreshaga mu gihe cye n’ibindi bagiye bongeramo.

Obama yagize ati “Mbega urugendo rwiza, nanjye ndacyafite Albums zose ze.”

Obama ari muri Jamaica aho kuva kuwa gatanu azanitabira inama y’ibihugu byo muri Caraibes akaganira n’abayobozi babyo.

UM– USEKE.RW