Icyo umusaza w’imyaka 80 asaba Urubyiruko

Kayitani Namuhoranye yavutse mu 1935 ubu atuye mu mudugudu w’Inyange Akagari ka Kabahizi, Umurenge wa Kacyiru, kuri uyu wa 08 Mata 2015 yari mu bitabiriye ibiganiro byo Kwibuka mu mudugudu atuyemo. Aganira n’Umuseke yatanze impanuro z’abakuru ku rubyiruko rw’u Rwanda rw’iki gihe.

Namuhoranye avuga ko umuzungu ageze mu Rwanda yasanze abarutuye bafite ubumwe budasanzwe, bahuriye ku rurimi rumwe n’umuco umwe, abona ko bidashoboka kubameneramo atabaciyemo amoko nk’uko byari biri mu bindi bihugu.

Amoko ubundi ashingira ku rurimi, umuco se cyangwa ibice abantu runaka batuyemo, abazungu ngo basanze abanyarwanda bavuga ururimi rumwe, bahuje umuco bafite ubumwe bukomeye kandi bategekwa n’umwami umwe. Byari bikomeye cyane ku bazungu kubategeka.

Kayitani Namuhoranye avuga ko gucamo abanyarwanda amoko atatu abayobozi bakurikiyeho bakabyubakiraho banganisha abanyarwanda icyavuyemo ari Jenoside yakorewe Abatutsi yahitanye miliyoni mu minsi 100 gusa.

Icyo Namuhoranye asaba ababyeyi ubu ni ukwigisha abana babo uko kuri, bakabasobanurira uko amoko yinjijwe mu banyarwanda, bakabasobanurira ko nta kamaro kayo uretse guteranya abanyarwanda.

Ati “Nka gahunda ya Ndi Umunyarwanda ni nziza kuko yigisha abantu ko ari abanyarwanda atari abo mu bwoko runaka.  Mfite umwana wanjye wa bucura w’imyaka 24, yakundaga kumbaza ibisobanuro byinshi ku moko ariko ubu ntashobora kumenya ngo uyu muntu ni umuhutu, umututsi cyangwa umutwa kuko namubwiye akiri muto ko twese turi abanyarwanda.”

Namuhoranye yasabye urubyiruko kwima amatwi abantu barwigisha urwango rushingiye ku moko kuko ntacyo rushobora kongerera abanyarwanda mu iterambere bagezeho uretse kubasubiza inyuma.

Mu biganiro byabereye aha ku mudugudu w’Inyange ku Kacyiru abatanze ibitekerezo benshi bibanze ku kugira inama urubyiruko barusaba ko ari rwo rukwiye kugira uruhare rukomeye mu gukumira inzangano n’amoko bishobora gusubiza u Rwanda mu icuraburindi.

Théodomir NTEZIRIZAZA
UM– USEKE.RW