Nyanza: Impanuka mu muhanda yahitanye umuntu umwe

25 Gashyantare 2015 – Umuntu umwe yitabye Imana mu mpanuka yo ku muhanda yabereye mu karere ka Nyanza mu mudugudu wa Kamushatsi Akagari ka Gatagara Umurenge wa Mukingo ahagana saa kumi n’ebyiri z’umugoroba kuri uyu wa gatatu.

Impanuka zo ku muhanda zikomeje gutwara ubuzima bw’abantu biturutse ahanini ku burangare bw’abatwara ibinyabiziga, umuvuduko mwinshi cyangwa kutubahiriza amategeko y’umuhanda.

Umushoferi witwa Claude Niragire wari utwaye imodoka ya Toyota Corolla Plaque RAA 727M yagonze umuntu umwe ubwo yariho agerageza guhunga imodoka yo mu bwoko bwa Toyota Coaster yari imuri imbere kuko yari imugendeye nabi nk’uko abivuga.

Uyu mushoferi yavuye mu muhanda ahita agonga umugabo wagendaga n’umaguru hafi aho ahita yitaba Imana.

Uyu wapfuye ni umugabo Merari Twagirumukiza w’imyaka 42, arubatse ndetse atuye hafi y’aho yagongewe nk’uko abatuye aho hafi babivuga. Uwamugonze ubu afungiye kuri station ya Polisi ya Nyamagana.

Polisi yo mu muhanda ikaba kenshi isaba abatwara ibinyabiziga kwitwararika igihe batwaye birinda umuvuduko ukabije, gutwara ibinyabiziga basinze no kubahiriza amategeko y’umuhanda kuko kenshi ibi ari byo biteza impanuka zihita ubuzima zigasiga ingaruka mbi nyinshi mu miryango.

Uwitabye Imana, imwakire….

Jean Paul NKUNDINEZA
UM– USEKE.RW