Umunyecongo ukekwaho kwica uwo bakundanaga yashyikirijwe Polisi ya Goma

Rubavu – Kuri uyu wa 10 Gashyantare 2015 Polisi y’u Rwanda yashyikirije ubutabera bwa Congo Kinshasa umusore witwa Kamanzi Semarembo wafatiwe mu Rwanda akekwaho kwica umukobwa bakundanaga akamubaga akamuvanamo umwana yari atwite inda yamuteye, agahungira mu Rwanda. 

Uyu musore yatawe muri yombi mu ntangiriro z’ukwezi kwa 10/2014 nyuma y’uko Polisi ya Congo ihaye amakuru iy’u Rwanda kuri uyu musore, wari umuyobozi w’ishuri ribanza ahitwa Bihabwe mu Rubaya muri Teritwari ya Masisi.

Semarembo Kamanzi yakundanaga na Uwimbabazi Munyarugero umwarimukazi mu kigo cy’amashuri abanza i Bihabwe muri Masisi.

Uyu musore akaba yari yabonye buruse (bourse) y’Itorero ry’Abadiventiste b’umunsi wa 7 yo kujya kwiga muri Amerika, ariko ngo hagati aho yari yamaze gutera inda uyu mwarimukazi bakundanaga anabereye umuyobozi ku ishuri.

Rudacogora, musaza w’umukobwa wishwe nabi, yabwiye umunyamakuru w’Umuseke i Rubavu ko uyu musore yasabye mushiki we ko avanamo inda kuko itorero iyo rimenya ko yateye umukobwa inda ryari kumuhagarikira buruse maze umukobwa arabyanga amusaba ko areka akayibyara.

Rudacogora ati “Ni abantu duturanye mu rusisiro, mushiki wanjye yari amaze kugira inda y’amezi atandatu maze mu kwa cyenda kurangira tugira gutya turamubura.”

Rudacogora avuga ko baje kumenya uko byagenze nyuma y’ibyumweru hafi bibiri bamubuze.

Kamanzi Semarembo ngo yasabye uyu mukunzi we kumusura iwabo mu rugo aho abana na nyina na murumuna we bakaganira bakamugira inama, maze ajyayo.

Abagezeho, Kamanzi, nyina na murumuna we, ngo bafashe uyu mukobwa baramubaga bamukuramo umwana nawe ahita ahasiga ubuzima nk’uko Rudacogora abitangaza.

Ngo bahise bamushyira muri shitingi bamubika iminsi micye maze nyuma bacukura hafi y’urugo baramutaba. Icyakora ngo bacukuye huti huti ntibamutaba munsi cyane, ariko murumuna w’uyu musore bamushinga kujya arinda aho batabye uwo bishe kuko atari kure y’ingo.

Imbwa ngo niyo yabatanze.

Nyuma y’iminsi umunani umuryango w’umukobwa umubuze, imbwa yo mu ngo z’aho hafi ngo yaje kujya ijya aho bamutabye ikurikiye umwuka w’ikintu gipfuye maze murumuna wa wamusore akayitwama akayitera amabuye.

Bibaye nka gatatu abantu ngo bahise bahurura babaza icyo uwo mwana w’umusore apfa n’imbwa. Rudacogora ati “Aho kuguma aho akizwa n’amaguru arahunga, nyina nawe ngo abimenye ahita ahunga, umusore nawe babimubwiye ahita ahunga, ariko we yerekeza iyo mu Rwanda“.

Rudacogora avuga ko bataburuye bagasanga ni mushiki we batabye babanje kumubaga bakamuvanamo umwana nawe wahise apfa.

Polisi y’u Rwanda yahise ifata uyu musore 

Uyu munsi ku mupaka wa Rubavu na Goma, mu muhango wo gutanga uyu musore wafashwe tariki 07 Ukwakira 2014, Umuyobozi wa Polisi mu Ntara y’Uburengerazuba, CSP Reverien Rugwizangoga  yatangaje ko ku bufatanye bwa Polisi z’ibihugu byombi mu guhanahana amakuru, bahise bata muri yombi Kamanzi Semarembo akinjira mu Rwanda.

Dieudonné Kongolo Umushinjacyaha w’Umujyi wa Goma washyikirijwe uyu ukekwaho iki cyaha yashimiye ubufatanye hagati y’inzego za polisi z’u Rwanda na Congo zihuriye mu rwego rwa Interpol rwemerera ibihugu guhana abanyabyaha ngo babazwe ibyo bakekwaho aho babikoreye.

Kamanzi Semarembo wari umaze amezi ane afungiye mu Rwanda, yashyikirijwe polisi ya Goma yambuka umupaka ajya kubazwa ubwicanyi bw’indengakamere aregwa.

Patrick MAISHA
UM– USEKE.RW/Rubavu