Muhanga: Leta igiye kwisubiza ubutaka abaturage bayitwaye

Muri gahunda  yo gutangiza icyumweru  cy’ubutaka,  umukozi  ushinzwe iyandikisha ry’ubutaka  mu kigo  gishinzwe umutungo kamere  Marie Chantal Mukagashugi yatangaje ko  leta igiye  kwisubiza  ubutaka  bwayo  abaturage biyandikishijeho  igihe bahabwaga  ibyangombwa  bya burundu by’ubutaka.

Iyi gahunda  y’icyumweu cy’ubutaka,  yabereye mu  kagari ka Nyamirama  mu murenge wa Muhanga mu  Karere ka Muhanga kuwa 09 Gashyantare 2015   igamije  gusobanurira abaturage   ibyiza byo kwandikisha ubutaka ndetse n’ingaruka bigira mu gihe   banyirabwo banze kubwandikisha.

Mukagashugi yavuze ko  basuzumye  bagasanga hari bamwe mu baturage,  biyandikishijeho ubutaka bwa leta ndetse  bakaba barahawe ibyangombwa bya burundu kandi biriho umutungo wa leta ari nabo basaba ko  bakosoza  ibi byangombwa kugirango  leta isubirane umutungo wayo.

Ati “Hafi  mu turere  twose ibibazo nk’ibi  byagiye bigaragara ariko turifuza  ko byakosoka noneho  ubutaka  bukandikwa ku babufiteho uburenganzira gusa »

Uwitije Gabriel umuturage utuye  mu kagari ka Nyamirama avuga ko  afite ikibazo  cyo gutandukanya  urubibi rw’ishyamba  rya leta n’irye kuko  yigeze  gukurikiranwa n’inzego azira ko yatemye ishyamba  rya leta kandi  ngo yaribwiraga ko ari mu kwe.

Uwitije yasabye   abashinzwe  ubutaka ko bamusobanurira  neza  aho imbibi zihera n’aho zigarukira kugirango azabashe kubona  uko icyangombwa cye gikosorwa aho  kwiyitirira ubutaka butari ubwe.

Habinshuti Védaste, Umunyamabanga Nshingwabikorwa w’umurenge wa Muhanga yavuze ko  hari bamwe mu baturage  biyandikishijeho ubutaka bwa leta ku bushake   bagamije  kujijisha kugirango bigwizeho  umutungo,   kuko  amakuru menshi y’ubutaka bwa leta bagiye bayahabwa n’abavuga  rikijyana  babarizwa mu midugudu  aba baturage baherereyemo, ariko bakabyirengagiza nkana.

Iki kigo cy’umutungo kamere cyashizeho itsinda  ribahuza n’abakozi  b’Umuvunyi  mu rwego rwo kugenzura   abaturage biyandikishijeho ubutaka bwa leta.  Urutonde     rw’aba baturage   rukazatangazwa  mu gihe cya vuba.

Icyumweru cy’ubutaka    mu rwego rw’igihugu cyatangiye  taliki ya 09 Gashyantare, kikazasozwa  kuwa 27 Werurwe 2015.

Insanganyamatsiko iragira iti: Andikisha  ihererekanya ryose,  ry’ubutaka, witaye ku cyo ubutaka bwagenewe gukoreshwa.”

Mu ntara y’Amajyepfo, ibibazo by’abaturage biyanditseho ubutaka bwa leta, byagaragaye  mu karere ka Muhanga, Nyamagabe, na Nyaruguru.

Elize Muhizi
UM– USEKE.RW