Uwinkindi yatangaje ibinyoma ko abamwunganira batarishyurwa – MINIJUST

Nyuma y’uko mu rubanza Pasiteri Jean Uwinkindi akurikiranyweho ibyaha bya Jenoside yakorewe abatutsi atangaje ko abamwuganira mu mategeko batarishyurwa, Minisiteri y’Ubutabera(MINIJUST) yahakanye ibyavuzwe na Uwinkindi mu kiganiro yagiranye n’abanyamakuru ku mugoroba wo kuri uyu wa 22 Mutarama 2015 ivuga ko kugeza ubu Leta imaze kwishyura abunganizi b’uregwa amafaranga arenga miliyoni 82. Uru rubanza ngo nirwo rumaze gutwara amafaranga menshi mu manza zose zaciwe nk’izi mu Rwanda.

Johnson Busingye Minisitiri w’Ubutabera yavuze ko abunganira Pasiteri Jean Uwinkindi aribo Me Niyibizi Jean Baptiste na Me Gatera Gashabana bamaze guhabwa amafaranga arengera miliyoni 82 kandi aba bunganizi akaba ariyo bagomba kwishyurwa.

Mu rubanza rwabaye kuwa 21 Mutarama 2015, Jean Uwinkindi yavuze ko Leta itajya yishyura abamwunganira bigatuma batitabira urubanza uko bikwiye, uyu munsi Minisitiri Johnson Busingye yasobanuye uko urubanza rwatangiye  ndetse n’uko abunganizi bahabwaga amafaranga yabo.

Yavuze ko kuva  mu kwezi kwa kane 2012 Jean Uwinkindi agezwa mu Rwanda  abunganizi be mu mategeko bakoze amasezerano yo kujya bishurwa amafaranga ibihumbi 30 kw’isaha, ibi ngo niko byakozwe kugeza mu mwaka wa 2013 ukwezi k’Ugushyingo, aho amasezerano yaje guhindurwa kuko Leta yari imaze kubona ko aya mafaranga ari menshi cyane kandi umusaruro ntugaragare.

Ukwezi k’Ugushyingo 2013 niho amasezerano bayahinduye bemeranywa ko abunganizi ba Uwinkindi bajya bahabwa amafaranga angana na miliyoni imwe ku kwezi, mu kwezi k’Ugushyingo  amafaranga yari amaze gukoreshwa muri uru rubanza yangana na miliyoni 38.

Minisitiri Busingye avuga ko kugeza aha Leta ngo yarebye aho urubanza rugeze ruburanishwa isanga rukiri mu mizi ntaho ruragera bityo ngo byatumye Leta ibona ko hakwiye kujyaho politiki y’ubwunganizi y’abantu baturutse mu mahanga  bashinjwa ibyaha bya jenoside yakorewe abatutsi mu 1994 , maze bumvikana ko buri rubanza rugomba gutwara amafaranga angana na miliyoni 15.

Amafaranga ahabwa abunganira abantu mu mategeko Min.Busingye Johnson yasobanuye ko ari amafaranga aturuka mu misoro y’abaturage kandi ko agomba gucungwa neza.

Yongeyeho ko abunganizi ndetse n’uregwa ibi byaha usanga batinza urubanza ku mpamvu zidafatika bityo ko buri rubanza  rugomba kubahiriza Politiki y’ubwunganizi.

Kubera kutitabira urubanza kwa Me Niyibizi Jean Baptiste na Me Gatera Gashabana kuwa 21 Mutarama 2015, Urukiko rwasabye ko Jean Uwinkindi yashakirwa abandi bunganizi kugirango urubanza rukomeze, gusa uregwa ntiyishimiye iki cyemezo.

Min. Busingye abajijwe niba byemewe gusimbuza abunganizi yavuze ko mu rubanza ibidahinduka ari umuntu uregwa n’urubanza aregwa gusa, naho abandi bose bahinduka barimo abacamanza, abashinjacyaha n’abunganizi .

Yongeye ko u Rwanda rumaze kugira abunganizi barenga 1 000 bityo ngo nta mpungenge zihari zuko Pasiteri Uwinkindi yabura abunganizi.

Igihugu cyo hanze kijya kohereza umuntu ushinjwa icyaha ari uko cyimaze kugirana amasezerano na Leta y’u Rwanda y’uko u Rwanda  ruzishyura abunganizi mu mategeko, aha MINIJUST yavuze ko aya masezerano bayagirana ariko akaba avuga ko Leta izunganira abo byagaragaye ko batishoboye, akaba ari mpamvu iyi Minisiteri yashizeho urupapuro  umuntu wese ucyeneye ubwunganizi  yuzuza akagaragaza ko atishoboye koko.

Kugeza kuwa 6 Ugushyingo 2014, Minisiteri y’Ubutabera yari imaze kwishyura amafaranga angana na 82,627, 430Rwf ku rubanza rwa Uwinkindi ariko bikaba bigaragara ko urubanza rutaragera muri kimwe cya Kabiri(1/2) ruburanishwa. Uru rubanza ngo nirwo rumaze gutwara amafaranga menshi mu manza zose zaciwe.

Théodomir NTEZIRIZAZA
UM– USEKE.RW