Ganza Alex ari ku rutonde rwa Rayon ariko ntarayisinyira

Ganza Alex bita Bebe, umunyezamu wahoze muri Police FC nubwo yatanzwe ku rutonde rw’abakinnyi Rayon Sport izifashisha mu mikino nyafrika ya Confederation Cup yatangaje ko atarasinya amasezerano n’iyi kipe.

Ganza Alex yabwiye Umuseke ko yatunguwe no kwibona kuri urwo rutonde kandi nta biganiro byo kubakinira aragirana na Rayon Sports.

Uyu mukinnyi ariko avuga ko Theirry Hitimana, Team Manager wa Rayon Sports, aherutse kumubaza niba yakwemera gukinira iyi kipe.

Ati “Namubwiye ko niteguye kuganira n’ikipe iyo ariyo yose ariko kugeza ubu ntabwo bigeze bamvugisha.”

Uyu mukinnyi kugeza ubu nta kipe afite akavuga ko iyamwegera yose bagirana ibiganiro.

Uyu musore waciye no mu ikipe ya Mukura VS ari mu baherutse gusezererwa mu ikipe ya Police FC umwaka ushize wa shampionat.

Thierry Hitiamana, Team Manager wa Rayon Sports avuga ko kuvugana na Ganza Alex bavuganye, ndetse ko hari n’ibyo bumvikanye ariko nka Rayon Sports batarabimuha. Akavuga ko bazabimuha vuba maze akaba umukinnyi wabo. Ibyo bumvikanye ni amafaranga, Hitimana akavuga ko hari ibyo ngo atatangaza mu itangazamakuru.

Jean Paul NKURUNZIZA
UM– USEKE.RW