Peace asanga kuririmba ‘live’ byakabaye intego ya buri muhanzi

Jolis Peace umwe mu bahanzi bazwiho ubuhanga mu njyana ya R&B, akaba n’umwe mu bitabiriye irushanwa rihuza abahanzi bo mu Karere k’Afurika y’Iburasirazuba rya ‘Tusker Project Fame 6’, asanga abahanzi nyarwanda bakarwanye urugamba rwo kwibanda mu kuririmba ‘Live’.

Ibi abitangaje nyuma y’aho aririmbye mu gitaramo cyarimo abahanzi bakomeye b’abanyarwanda aribo Cecile Kayirebwa, Kipeti na Byumvuhore Jean Baptiste aho abantu bishimiye uburyo bw’imiririmbire ye.

Mu minsi ishize nibwo uyu muhanzi yatangaza ko yifuza kuzarinda ahagarika muzika atongeye kuririmbira kuri CD umwe mu mico abahanzi nyarwanda barimo kugenda basa naho bahagarika.

Peace yagize ati “Nkurikije uburyo nabonyemo abahanzi nka Byumvuhore Jean Baptiste umwe mu bahanzi twavutse dusanga indirimbo ze zikinwa kugeza uyu munsi, nibaza ko ari isomo rikomeye abahanzi b’ubu twakabaye twiga.

Mu Rwanda hari abahanzi benshi cyane bazi kuririmba, ariko nanone umuntu ashobora kwibaza impamvu batajya ahagaragara ngo bamenyekane cyangwa se hagire ibikorwa runaka bamenyekaniramo.

Imwe mu mbogamizi ku bahanzi ituma no kuririmba by’umwimerere bigorana, ni uburyo bw’imyandikire y’indirimbo cyangwa se injyana yahisemo gukora.

Nibaza ko muzika nyarwanda uburyo igenda irushaho gukundwa ari nako n’abahanzi twakarushijeho gukundisha abantu kuririmba ‘Live’”.

Peace ni umwe mu bahanzi bakorera mu nzu itunganya muzika izwi nka Future Records ikorerwamo na producer David. Iyi nzu akaba ari nayo yafashije umuhanzi Alpha Rwirangira mu iterambere rya muzika ye.

Joel Rutaganda

UM– USEKE.RW