Danny Nanone avuga ko ari mwarimu w’abandi baraperi

Ntakirutimana Danny umuhanzi ukora injyana ya HipHop uzwi cyane ku izina rya Danny Nanone mu Rwanda, avuga ko igihe cyose amaze muri muzika hari byinshi afite atari yakora ahubwo ko abigereranya nk’imirabyo irabya mbere y’uko inkuba ikubita.

Danny Nanone ni umuhanzi wamenyekanye cyane ubwo yakoranaga indirimbo “Akamunani” n’umuhanzi King James bityo ituma amenyekana cyane nk’umuraperi ukiri muto.

Mu ndirimbo yashyize hanze nshya yise “Njye ndarapa”, uyu muraperi avuga ko n’ubwo abaraperi bagenzi be bakunze kwivuga imyato, ahubwo bakagiye bamwita mwarimu akabita abanyeshuri bitewe nuko bose baje bamusanga muri muzika.

Agira ati “Ibyo maze gukora muri muzika mbifata nk’imirabyo kuko inkuba ntabwo zirakubita, ninjye muraperi urapa bagatwarwa”.

Amwe mu magambo Danny Nanone avuga muri iyo ndirimbo, avuga ko ariwe muhanzi w’umuraperi uririmba mu bukwe ndetse ari nawe udafata ibikoresho (Inzoga cyangwa itabi) mu bandi baraperi.

Uyu musore ni umwe mu bahanzi bakunze kurangwa n’ubwitonzi mu bintu byose aba arimo, mu busanzwe akaba adakunze kugaragara mu dutsiko tw’abandi bahanzi wenda barimo kunywa inzoga cyangwa itabi mbere y’uko bajya kuri ‘stage’.

Abazi uko umuziki ukorwa bavuga ko uyu musore afite ubuhanga mu kazi ke bitewe n’imyandikire y’indirimbo ze n’uburyo awukoramo. Umva indirimbo nshya yise “Njye ndarapa”

[youtube url=”https://www.youtube.com/watch?v=XeNkdLIUUz4″ width=”560″ height=”315″]

Joel Ruraganda

UM– USEKE.RW