Abana 2 batwitswe na essance umwe yitaba Imana

Nyagatare: Niyigena Evangeline na Dukuzumuremyi Onesphore abana bo mu kigero cy’imyaka itanu, batwitswe na essence mu gihe uwitwa Said Munyankindi yatwikaga amahembe y’inka ngo ashaka ibiryo by’inkoko.

Iyi nkuru nubwo yabaye kuwa wa kane nijoro, ngo yamenyekanye nyuma y’uko umwe muri aba bana yitabye Imana kubera ubushye. Ibi byabereye mu Mudugudu wa Benishyaka, Akagari ka Rurenge, Umurenge wa Rukomo ho mu Karere ka Nyagatare, nkuko tubikesha Police y’akarere ka Nyagatare.

Aba bana ngo bafashwe n’umuriro kubera uburangare bwa nyiri ugutwika amahembe, kuko aba bana bari bari hafi ye, we akabasha kwitaza ubwo ibirimi by’umuriro byabaga byinshi bigafata aba bana.

Niyigena Evangeline niwe witabye Imana, nyina umubyara Nyirahirana Domitila yatangarije Radio Rwanda ko nyuma y’uko umwana amucitse gato, yongeye kumubona yahiye umubiri wose. Uyu mwana akaba yapfiriye mu bitaro bya Kigali CHUK nyuma yo kuvurirwa mu bitaro bya Nyagatare kuri uyu wa gatanu.

Police ikaba yibukije abaturage ba Nyagatare ko bakwiye kujya bihutira gutanga amakuru ku biba byabaye ngo yihutire gutabara.

Munyakazi Said we ubu afungiye kuri station ya Police I Nyagatare aho akurikiranyweho icyaha cyo kwica umuntu atabigambiriye.

Jean Paul Gashumba
UM– USEKE.COM