Amahoro yatumye inama ya EALA tuyizana mu Rwanda – Hon Abdirahan Abdi

Inama y’inteko inshingamategeko y’umuryango w’afurika y’uburasirazuba (EALA) yatangiye imirimo yayo kuri uyu wa kabiri mu nteko ishinga amategeko y’u Rwanda, iyinama ikaba izamara ibyumweru bibiri.

Kuri uyu wambere perezida w’inteko ishingamategeko ya EALA (East African Legislative Assembly), Honorable ABDIRAHAN Haither Abdi yavuze ko kuba u Rwanda rwarakiriye  iyi nama, ari uko rukomeje kuba intanga rugero mu birebana n’amahoro, ubumwe, n’ubwiyunge ndetse n’imiyoborere myiza.

Nkuko byatangajwe na Perezida w’inteko ishingamategeko y’ibihugu bihuriye no mu muryango w’afurika y’uburasirazuba Hon.ABDIRAHAN Haither Abdi mu gihe cy’ibyumweru bibiri abagize inteko ya EALA bazibanda ku mategeko arebana n’ubuzima bwa buri munsi bw’abaturage bo mu bihugu bihuriye muri uyumuryango.

Imwe mu mishinga izaganirwaho mu nama ya EALA iteraniye i Kigali harimo amategeko arebana n’uburenganzira bwa muntu, umushinga w’inteko ryo kurwanya amashashi yangiza ibidukikije muri east Africa, ndetse umushinga w’inteko urebana no gushyiraho ikigo cyigisha ibijyanye n’imikorere y’inteko ishingamategeko mu karere.

Perezida  Paul Kagame wari umushyitsi mukuru yavuze ko yashimishijwe no kuba iyi nama barahisemo ko iteranira mu Rwanda.

Yavuze ko yizeye ko EALA izashyira imbara mu gufungura imipaka y’ibihugu bigize umuryango wa East African Community, kugira ngo ubucuruzi bworohe, anabasaba kumvisha abatuye aka karere ko iyi gahunda ari iyabo bose.

Rubangura Daddy Sasiki
UM– USEKE.COM