Kirehe: Ntibarihuga wemera kwica umugore we yaburanishijwe mu ruhame

Urukiko rwisumbuye rwa Ngoma kuri uyu wa kane tariki 9 Ukwakira 2014 rwatangiye kuburanisha mu mizi urubanza rwa Ntibarihuga Daniel wo mu mudugudu wa Nyagasozi, akagari ka Ruhanga umurenge wa Kigina mu karere ka Kirehe, mu ntara y’Uburasirazuba ukurikiranweho n’ubutabera icyaha cyo kwica umugore we Mukantwari Violette amukubise agafuni mu mutwe.

Ntibarihuga Daniel nyuma yo kwica umugore we yahise aburirwa irengerro atorokera mu gihugu cy’abaturanyi cya Tanzania hanyuma ariko aza gutabwa muri yombi mu minsi ishize agarurwa mu Rwanda ahita ajyanwa muri gereza.

Urubanza rwe rwatangiye kuburanishwa aho mu ruhame aho yakoreye icyaha. Ntibaribuga imbere y’inteko iburanisha yabanje gusomerwa imyirondoro ye yemera ko ariwe koko.

Mu iburanisha ry’uru rubanza urukiko rwamubajije niba afite umwunganira ahakana avuga ko yagerageje kuvugana na we ariko biza kwanga kubera impamvu z’amafaranga make. Ariko hagati aho urukiko rwasanze nta mpamvu yo kutaburanisha uru banza kuko uwagombaga kunganira uregwa Maitre Musabwa Frederick ngo yahawe umwanya wo gusoma iyo dosiye.

Iburanisha ry’urubanza ryatangiye umushinjacyaha ku rwego rwisumbuye rwa Ngoma, Me Niwenizeye Javan asoma ibijyanye n’icyaha cy’uregwa.  Ntibarihuga Daniel yemeye icyo cyaha anagaragaza uburyo yacocaguye umugore we akoresheje isuka ya macaku kugeza ashizemo umwuka.

Gusa urukiko rumubajije icyifuzo cye yavuze ko icyaha acyemera n’ubwo atatekerezaga ko ibyo yakoze byari kuviramo umugore we gupfa avuga ko ngo na atazi uko byamugendekeye, ariko ngo kubera inyungu z’abana yagize impfubyi kandi bakaba batagira kirera akaba asaba ko urukiko rwamugabanyiriza ibihano.

Ubushinjacyaha bwamusabiye igifungo cya burundu no kwishyura amagarama y’urubanza aramutse ahamwe n’icyaha.

Naho abaregera indishyi bakazagana inkiko. Tubibutse inkomoko y’urupfu rw’uwo mugore yari amahane no kutumvikana kwaranzwe mu rugo rwabo aho umugabo bivugwa ko yasahuraga umutungo w’urugo awujyana mu nshoreke ngo zaba zibarizwa mu murenge wa Kigarama ho mu karere ka Kirehe.

Ubwo ibyo byabaga, uyu muryango wari warashyingiranywe mu buryo bwemewe n’amategeko, wari wiyemeje kugana inkiko ngo zibatandukanye. Muri iyo minsi ngo birashoboka ko nyakwigendera yarimo ashakisha kashe mpuruza ngo babashe kugabana imitungo agire n’uburyo bwo kurera abana bari babyaranye dore ko umuto muribo afite umwaka umwe gusa.

Ntibarihuga Daniel n’umugore we Mukantwari violette bari bafitanye abana batandatu.

Bamwe mu bari bitabiriye iburanishwa rya Ntibarihuga Daniel bagaragaje impungenge z’uko nibaramuka bamukatiye gufungwa burundu abana babo bazabaho nabi.

Uwitwa Munyakazi yagize ati “Ndabyemera yakoze icyaha gikomeye akwiye guhanwa ariko nanone batekereze ku bana basigaye mu rugo bonyine nibura bamukatire nk’imyaka icumi.”

Undi witwa Muhawenimana Jeannette na we uvuga ko Isi yarangiye, ku bwe ngo Ntibarihunga yakoze amahano ariko nanone ngo kuri we nk’umubyeyi atewe impungenge n’utwana twabo.

Uru rubanza ruzasomwa tariki 17 Ukwakira 2014 ahabereye icyaha mu mudugudu wa Nyagasozi.

Elia BYUK– USENGE
UM– USEKE.RW