PAC ntiyanyuzwe n'ibisobanuro bya REB ku makosa yabaye muri ‘One laptop per child’

Mu gihe cy’amasaha agera kuri atatu abayobozi b’Ikigo cy’Igihugu cy’Uburezi, (REB) bamaze imbere y’abadepite bagize commission yo gukurikirana imari ya leta (PAC), babazwa amakosa yaranze iki kigo mu gukoresha nabi imari ya leta, kuri uyu wa kabiri tariki 7 Ukwakira 2014, abayobozi ba REB babuze icyo bavuga biyemeza guhindura imikorere.

Gahunda ya ‘One Laptop per child’ (Mudasobwa imwe kuri buri mwana), ni kimwe mu bintu byamaze umwanya bitangwaho ibitekereo cyane hagaragazwa amakosa yakozwe, umuyobozi wa REB, John Rutayisire na we akaba yisobanuraga n’abo bakorana ku ruhuri rw’amakosa yaranze iyi gahunda.

Ikimenyane, kutareba kure (mu gutanga mudasobwa ahantu hataba amashanyarazi), kutamenya gutegura umushinga neza wa One laptop per child ngo unonosorwe mbere yo gushyirwa mu bikorwa, ibyo ni bimwe mu bibazo abadepite bibazaga ndetse banabibaza umuyobozi wa REB kugira ngo asobanure neza icyabaye intandaro y’amakosa yaranze One Laptop per child.

Abadepite bagize PAC basabye ibisobanuro by’ukuntu hari abanyeshuri bahawe mudasobwa za One laptop per child, ariko na n’ubu nyuma y’imyaka ine (4) ishize bakaba batazi kuzifungura ngo kuko zifite code (key word). Basabye gusobanurirwa uburyo mudasobwa zitahanwa imuhira n’abarimu ndetse n’abanyeshuri kandi atari ko byari bigenwe muri gahunda.

Abadepite kandi basabye ibisobanuro ku kuntu, program zashyizwe muri mudasobwa mu 2010, ubu zaba zikigezweho. Abadepite basabye ibisobanuro ku buryo hari mudasobwa na n’ubu zatumijwe ariko ntizikoreshwe, izindi zijyanwa ahantu hatagira amashanyarazi, ibintu Hon Nkusi Juvenal yavuze ko birenze ukwemera ndetse ngo nta muntu ufite ubwenge wabikora.

Abadepite basabye REB gusobanura icyo yari igamije kugeraho ubwo yatangizaga gahunda ya One laptop per child n’impamvu kitagezweho. Muri rusange gahunda yari kugera mu bigo byose nk’uko gahunda yitwa, ariko ngo ibigo 400 gusa ni byo byahawe izo mudasobwa.

Ibi ni byo byatumye, PAC yibaza niba umushinga wa One laptop per child warizwe neza mbere y’uko ushyirwa mu bikorwa. Ikindi gitangaje ngo ni uko izo mudasobwa zari gutegurirwaho amasomo abarimu bakazifashisha bigisha ariko zikaba zidafite program n’amasomo amwe na mwe nk’uko na REB yabyemeye.

Mu gusubiza urwo ruhurirane rw’ibibazo, hamwe na hamwe REB yagerageje kwirwanaho, ahandi imanika amaboko yemera amakosa yabayeho inavuga ko igiye gukurikiza inama yagiriwe ikanavugurura imikorere.

Ku kibazo cy’uko hari mudasobwa zajyanywe ku bigo bidafite umuriro w’amashanyarazi, Ntaganzwa Damien, Umuyobozi muri REB ushinzwe guteza imbere ibyo kwigisha (T.D.M) yavuze ko amakosa atakozwe na REB ngo kuko yo yajyanaga mudasobwa yabwiwe ko ikigo kizashyirwaho amashanyarazi, bityo amakosa akaba ari aya EWSA.

Abadepite bamubajije niba hari amasezerano azwi REB yagiranye na EWSA, avuga ko ntayo, ibintu Perezida wa PAC yahise avuga ko Ntaganzwa arimo kwirwanaho mu bintu buri wese yumva ko ari amakosa.

Akemanga uko mudasobwa zatanzwe, Perezida wa PAC akaba yavuze ko mudasobwa zishobora kuba zaratangwaga bitewe n’imbaraga z’umuyobozi uyobora ikigo cy’amashuri iki n’iki.

John Rutayisire, Umuyobozi wa REB yagerageje kunganira mugenzi we avuga ko uburyo gahunda ya One laptop per child yari iteye, noneho hagiye kurebwa uko mudasobwa zashyirwa muri Computer labs (Salle irimo mudasobwa nyinshi) noneho buri munyeshuri akajya agira amahirwe yo kuyikoresha.

Yavuze ko buri kigo cy’amashuri mu Rwanda cyagejejweho ingufu z’imirasire y’izuba ku buryo izo computer labs zizakora neza kandi abyizeza abadepite.

Yagize ati “Ubu noneho turakora ibyo twari kuba twarakoze mbere banyakubahwa.”

Ibi rero byateye abadepite urujijo babaza niba One laptop per child ivuyeho igahinduka ‘One laptop for many children!’, ariko John Rutayisire uyobora REB avuga ko program itavuyeho ngo ahubwo hagiye kureba uko mudasobwa zasaranganywa.

Yagize ati “Ntabwo gahunda yahindutse, computers zihari ni ukuzisaranganya ariko bidakuyeho poliki ya One laptop per chalid.”

Mu gusoza ibibazo kuri iyi gahunda ya One laptop per child, umwe mu badepite yagize ati “Ibibazo bya One laptop per child ntitwabivuga ngo birangire…”

PAC ikaba yatanze inama kuri REB yo kunonosora neza iyi gahunda ngo kuko hari ibihugu byinshi muri Africa byaje kuyikopera ku Rwanda, nabyo bikayikoresha ku buryo niba u Rwanda rwaba ruyihinduye byafatwa nk’igisebo ku gihugu.

Ntabwo ari One laptop per child yavuzweho gusa kuko PAC yanagarutse ku gucungwa nabi umutungo wa leta mu kigo REB,  gahunda y’abarimu bafasha abandi barimu mu rurimi rw’Icyongereza (Mentorship) nayo irimo ibibazo, ibikoresho by’ubwubatsi bw’amashuri byariwe, ndetse no kwishyuza abahawe bourse barangije kwiga na n’ubu bigenda biguru ntege bigatuma hari abana b’u Rwanda benshi batabona inguzanyo mu kwiga.

One laptop per child ni gahunda yatangiye mu 2010 ndetse mudasobwa zatumijwe na Minisitiri w’Uburezi, Mutsindashyaka Theoneste mu rwego rwo kwihutisha ikoranabuhanga mu burezi bw’u Rwanda.

HATANGIMANA Ange Eric
UM– USEKE.RW