EU igiye gufasha u Rwanda kugira ingufu zitangiza ikirere zihagije

Umuryango w’ubumwe bw’Uburayi (European Union) urateganya gutanga miliyari 3,3 z’amaEuro ku mishinga yo guteza imbere ingufu zitangiza ikirere hagati ya 2014 na 2020 mu bihugu bitandukanye ku Isi.

Muri ariya ma Euro, agera kuri miliyari 2 azagenerwa ibihugu bitanu byo ku mugabane wa Africa nk’uko byatangajwe mu itangazo ryasohowe n’uyu muryango kuri uyu wa mbere.

Itangazo ry’uyu muryango riravuga ko Perezida wa Komisiyo yawo Jose Manuel Barroso azasinya kuri iyi nkunga kuri uyu wa 23 Nzeri i New York akazafasha ibihugu bitanu bya Africa; Cabo Verde, Cote d’Ivoire, Liberia, Togo n’u Rwanda guteza imbere iriya mishinga y’ingufu zitangiza ikirere.

Ayo masezerano azaba agamije ahanini guteza imbere no kongera bene ziriya ngufu zitangiza ikirere ndetse no mu byaro ahakenewe ingufu z’amashanyarazi.

Ingufu zitangiza ikirere zibamo izokomoka ku mirasire y’izuba, iza nyiramugengeri n’izikomoka ku bimera ndetse na Gazi Methane aho iri.

Jose Barroso avuga ko bene izo ngufu ari ngombwa mu kubaka iterambere rizaramba.

Ati “Nishimiye ko tugiye gufatanya nk’ibihugu by’Uburayi n’ibya Africa byateye intambwe yo kwiyemeza kwihaza mu ngufu.”

Manuel Barroso ubu ari i New York ahari kubera inama ku mihindagurukire y’ikirere mu nyubako y’Umuryango w’Abibumbye, ari naho aya masezerano ashyirwaho umukono kuri uyu wa kabiri.

XinuaNews

UM– USEKE.RW