Muri IYI NKURU muri kumwe na AMABILIS SIBOMANA

.Radiyo Rwanda Radiyo rukumbi ibyo yavugaga byabaga ari nk’ihame

.Yumva adafite ijwi ryiza nubwo benshi barimukundiye

.Perezida yirukanye umunyamakuru kuko yakerereje amakuru

.Umushoferi yatinze gutwara abanyamakuru bamufunga imyaka itatu…

Abakunze kumva Radio Rwanda mu myaka yashize bumvaga umugabo usoma ingingo z’amakuru yarangiza ati “Muri aya makuru muri kumwe naaaa Amabilis Sibomana”. Uyu yaranzwe no gukunda akazi mbere na nyuma ya Jenoside mu gihe cy’imyaka isaga 35 yamaze kuri Radio Rwanda. Ubu aratuje ari mu kiruhuko cy’izabukuru ku rugo rwe i Musambira mu karere ka Kamonyi.

Aho atuye ni mu birometero bicye uvuye ku muhanda wa kaburimbo ugana mu majyepfo, ni ku gasozi kirengeye ahari akayaga gahehereye, haratuje kandi hafite uburyo hihariye, uhari avuye za Kigali yumva ahakunze cyane.

Avuga ko yagiye gutura i Musambira kuko akunda akayaga k’aho aba ubu, kandi yari agamije kujya kwisabanira n’abaturage mu zabukuru ze nyuma y’imyaka myinshi aba i Kigali.

I Musambira kuri centre yahashinze “Papeterie” yita iy’abaturage ngo bajye babona aho bafotoza kuko cyari ikibazo cy’ingutu. Aba munzu ubona igezweho, n’umuryango we ubona wishimiye ibyo yakoze agifite imbaraga.

Amabilisi Sibomana aherutse kugira imyakaka 62, ni umugabo mukuru ugifite imbaraga, wubatse, ufite umugore n’abana bane. Mu bana be, ntawakurikiye iby’itangazamakuru se yakoze igihe kinini.

Umuseke waramusuye tuganira birambuye…. 

Umuseke:Kuki wahisemo kumvikana nka “Amabilisi”

Sibomana: Ahhhh nabanje kujya mvuga Aimable ariko abo twari duturanye iwacu mu Byimana   ntibanyumvaga kuko banyitaga “Amabilis” mpitamo ako kazina, karanumvikana neza, abantu baragakunda.

Itangazamakuru waritangiye ryari? Gute? Ese warihagaritse ryari?

Sibomana:Umwuga nawutangiye  mu 1973  nyuma yo kubona  impamyabumenyi y’ibanze  mu by’uburezi  hanyuma  njya gukora  muri ORINFOR  ikiri Minisiteri y’Itangazamakuru, nararikoze (itangazamakuru)  nyuma  nza  kujya kuryiga mu Budage marayo amezi 13  tubifashijwe na kiriya kigo cya Deutsche Welle .

Nakoreye Radiyo Rwanda  mu ishami  ry’amakuru  y’Ikiynarwanda ndetse nza no kurihagararira, naje guhagararira  ORINFOR  mu Ruhengeri no  mu mujyi wa Kigali  nza kuva kuri Radio Rwanda  muri cya gihe cy’igabanywa ry’abakozi muri 2006  nyuma njya kuyobora  Radiyo yigenga  “Izuba”. Iyi Nayiyoboye muri 2007  nerekeza mu za bukuru muri2009.

Wakoze umwuga mu bihe bibiri bitandukanye. Ukora umwuga wari wifashe gute?

Sibomana:Itangazamakuru ryari ritaratera imbere, Radiyo Rwanda yari rukumbi kuko Televisiyo ije   ejo bundi  muri za 92. Radiyo Rwanda yari  imwe ndetse ibinyamakuru  hari Imvaho,  Releve na  Kinyamateka ya Kiliziya  n’utundi duto. Twarawukoze ibihe bitari byoroshye cyane ko njye naninjiye muri ako kazi nyuma gato y’ihinduka  ry’ubutegetsi kuri ‘Coup d’Etat”.

Radiyo Rwanda ntiyageraga hose, ntabwisanzure bwari buriho abanyamakuru bari barize umwuga bari bake ariko twarageragezaga.

Ibikoresho by’umwuga byari bimeze gute?

Sibomana:Twari dufite ibikoresho bikomeye byazanwaga n’abadage ariko nta buryo bwo kunononsora amajwi bwari buhari “Hari muri Analogue”

Uzi kwikorera ikitwaga “Nagra” cy’ibiro 16 ugaterera umusozi!! Ariko ubu ubu ujyana akantu kangana n’ikibiriti ukazana amajwi meza.

Amajwi yabaga ari ku kagozi wakataga wifashishije umukasi ugaterateranya..ntibyari byoroshye gutererana ikintu k’ibiro 16, ubanza aribyo byambujije no kuba muremure hhahhahah

Ubu uri gukurikirana umwuga uko uri gukorwa? Ubona umeze ute?

Sibomana: Ubu muri mu kintu cyo kurushanwa mu gihe twe yari Radiyo imwe yavugaga  bikaba nk’ihame. Ubona ko ubu hari ibitangazamakuru byinshi, hari ubwisanzure ku banyamakuru bwo gushaka akazi aho bakorera ku murongo wifuza.

Ikindi umuturage arumva Radiyo ashaka ndetse asoma ikinyamakuru ashaka ndetse n’urubuga rwaragutse ibyo mwandika nibyo muvuga bigera kure kuko ibyo mwanditse bibonwa n’isi yose.

Gusa mugomba kumenya ko muri ku rubuga mpuzamahanga mukamenya uko mugomba kubyifatamo mukagenda munoza nk’ururimi rwacu kuko rwo ruracyarimo ibibazo.

Ubona itangazamakuru rimariye iki igihugu?

Sibomana: Itangazamakuru ni ubutegetsi bwa kane (4) kuko abayobozi n’abaturage bararyiyambaza bose, kuko ari umuyoboro  ukomeye w’iterambere  ugaragaza  isura y’Igihugu ndetse n’ibibazo   bafite. Ni ikiraro gihuza abaturage n’ubuyobozi kuko ricukumbura n’ibyo ijisho ry’ubuyobozi ritabona.

Hatabayeho Itangazamakuru sinumva   ahubwo ikindi cyabaho kuko ubyutse ntiwumve Radiyo, wareba kuri Internet ugaheba niho wamenya ko itangazamakuru rifite ububasha bukomeye.

Hari abavuga ko itangazamakuru ryo mu Rwanda rireba ibitagenda gusa niko nawe ubibona?

Amabilisi Sibomana: Itangazamakuru ryo mu Rwanda rivuga byose ahubwo umenya rikabije kureba ibigenda neza cyane, hari umuco itangazamakuru ry’ubu rigenda rihindura wo gukorera mu bwiru, ritoza abanyarwanda kuva mu kintu cyo guhakirizwa kuko rigenda ryisanzura rivuga ibigenda n’ibitagenda ariko rikabikora mu muco w’Abanyarwanda wo  kubaka gahoro gahoro.

Ni ibiki bitagenda mu itangazamakuru ry’ubu ngo ribe iry’umwuga?

Sibomana:Itangazamakuru ni urwego rukiyubaka ndetse rukora bigendanye n’umuco. Icyo navuga nuko abanyamakuru mwakunda uyu mwuga, ubu mugomba kugaragaza ko uyu mwuga mwawize ndetse mukagaragara nk’abiyubashye mugashingira ku mahame  no ku kuri kuvuye ku isooko .

Itangazamakuru mukwiye kurihesha agaciro mwagera ahantu abantu bakabubaha, mukomeze kwihugura  ndetse  umwuga muwugire  umwuga abanyamakuru ntibafatwe nk’abantu babuze ibindi bakora kuko ari umwuga mwiza.

Ikindi mwarushaho gufasha abanyarwanda guhinduka bakareka gukorera mu bwiru bakubahana kandi bagahanahana  ibitekerezo kugirango bubake.

Igihugu ubona cyitaye ku iterambere ry’itangazamakuru?

Sibomana: Abanyamakuru nidufatanya tukagaragaza agaciro k’umwuga abandi nabo bazawuyoboka, mufatanye nuwashaka kubabangamira abure aho amenera. Igihugu sicyo kizabateza imbere nimwe ba mbere bo kwiteza imbere.

Itangazamakuru uribona umwuga urubyiruko rwajyamo ukarutunga rugatunganirwa?

Sibomana: Umwuga w’Itangazamakuru ni umwuga mwiza cyane gusa bisaba kumva ko uyu mwuga uwukunze…

Uzi gukora inkuru bakavuga ngo uriya munyamakuru yandika neza!!! Icya mbere ni ibyishimo ku mutima. Urubyiruko rwajyamo rufite ishema ryo kugirira akamaro abanyarwanda ariko ntiwajyamo wumva ushaka amafaranga ngo wubake za etage iyo za  Nyarutarama .

Ikindi uyu mwuga utuma abantu bafunguka, bihugura umunsi ku munsi ariko intego si imitungo myinshi kuko ibindi biraza ushobora no gukorera ibinyamakuru mpuzahanga bitewe n’ubuhanga bakubonanye no kuwukunda.

Abantu mu Rwanda wibuka bari  abahanga mu itangazamakuru ni bande?

Sibomana: Mu banyamakuru b’abahanga nibukamo ba Anastase Nzabirinda, Andre Nambaje, Gatabazi Felicien, Rusiya Karekezi, Martin Mateso ubu we akora ku rwego mpuzamahanga  n’abandi benshi twakoraga nka Equipe gusa abatwumvaga barabazi kundusha.

Njye sinavuga ngo nareberaga ku muntu ahubwo numvaga nshaka gukora ibishoboka nkaba narusha ba kanaka.

Ni ibihe bihe bikomeye wibuka byaranze itangazamakuru wakoragamo?

Sibomana:Natangiye ubutegetsi bugihinduka ndetse byari bigoye kuburyo hari ubwo wavugaga amakuru ukumva baguhamagaye kuri Telefoni zari “Fixe” ngo ibintu uvuze wabisubiramo?

Twaje kubona umuyobozi mwiza witwa Christophe Mpfizi abuza  abayobozi b’Igihugu gutelefona abanyamakuru maze tugenda tubona ituze.

Ubundi twakoreraga ku gitutu kuko ndibuka hari umunyamakuru wigeze gukerereza amakuru   Iminota itanu uwahoze ari Perezida Habyarimana ariyizira arangije aramuhagarika. Nyuma yaje kumugarura ari uko abantu bamubajije impamvu yaje gukanga umwana.

Ikindi gihe hari Hari umushoferi wakerereje abanyamakuru ba Radiyo Rwanda maze  abategetsi  bikanga ko habaye indi “Coup d’Etat” bahise bazana  abasirikari  benshi bavuye muri Camp Kigali. Icyo gihe Perezida yarategetse bafunga umushoferi imyaka itatu nta Dosiye.

Muri 1990 mu gihe cy’intambara umwuga w’itangazamakuru wari wasenyutse kugeza muri Jenoside aho wajyaga kuzana inkuru icyo wabonye ari umweru bakagutegeka kuvuga ko wabonye umukara wabirengaho bakaba bagukubita agashoka.

Hari n’igihe bazanaga amatangazo ngo uyasome uko bayanditse kandi Radiyo Rwanda ntawayivuguruzaga kuko yari Rukumbi.

Itangazamakuru ryaje gucikamo ibice bamwe batsimbarara ku mwuga, abandi bajya mu mashyaka ndetse bahinduka ibikoresho by’abategetsi.

Indi mbogamizi yari ikomeye abanyamakuru bose bahembwaga na Leta bakagutegera ku mushahara ndetse rimwe na rimwe bakakubwira ko utazi itangazamakuru.

Njye nirinze amashyaka n’inganiriro z’abanyapolitiki..nazanaga amakuru wenda bakantegeka uko nyavuga ariko ntagiye kugambana nabo ibi byamfashaga kumenya  uko nyavuga ariko nkayashyira  ku munzani  nifashishije ubunyamwuga  kandi nabo simbereke ko mbasuzuguye .. muri make kwari ukugendera ku majyi ntuyamene.

Ubu uhuye na Perezida w’u Rwanda wamuganiriza iki ku itangazamakuru?

Sibomana: Hahahaha mpuye nawe!! Namusaba ko inzego z’ubuyobozi zarifasha gutera imbere, ahora abivuga, ati kuki abantu bimana amakuru? Ubuyobozi bwiza bugomba kugira itangazamakuru riteye imbere.

Perezida uriho biragaragara ko aryumva kuko anariha umwanya rimwe mu kwezi bakamubaza ibyo bifuza. Gusa abanyamakuru nabo bagomba kurihesha agaciro kuko nibarihesha agaciro n’abandi bazariyoboka.

Abantu bavuga ko wasomaga amakuru neza….

Sibomana:Kumbwira ngo nasomaga neza ni abantu babimbwira njye simbizi. Gusa ndabyemera iyo babimbwiye kuko numva ntafite n’ijwi ryiza. Gusa ibanga nakoresheje ni ugukunda umwuga kuburyo  n’umufasha wanjye yigeze  kumbaza niba narashyingiranywe na Radio.

Ikindi ni imyitwarire nko kwirinda inzoga mu kazi ndetse n’andi maraha yo kwiyandarika nk’umustar.

Umufasha wawe mwahuye gute? Mwahuriye mu itangazamakuru?

Sibomana: Ntitwahuriye mu mwuga w’itangazamakuru ndetse sinzi niba yarankundiye kuvuga amakuru neza kuko atigeze abimbwira ndetse sinavuga ngo ni impamvu iyi n’iyi.

Ko abanyamakuru bakunda no kwidagadura wowe muri Muzika ukunda abahe bahanzi?

Sibomana: Nkunda izi ndirimbo zigenda buhoro nka ba Nana Musoukuri, izi ndirimbo z’igifaransa ndetse na  za Tuist zo muri East Africa.

Mu Rwanda nikundira indirimbo z’Impala ba Rugamba  urumva ni izituje n’utundi dutandukanye.

Icyo gihe  “Abastar “mwasohokeraga hehe?

Sibomana: Urabona Hotel Kiyovu, hariya hari Serena Hotel hari  Hotel Impala ndetse n’ahitwaga  muri  Terminus, kuri Paillage naho hari akabari gashyushye ubundavuga muri za 1970 na 1980  gusa iyo twavaga kuri Radiyo Rwanda twamanukaga ahitwaga mu Migano hariya hari  Hotel Kalisimbi hahahahha  za Mille Colline ntiwari kujyayo utambaye Karuvati hanyweraga abakomeye.

Ubuzima busobanuye iki kuri Amabilis

Ubuzima ugomba kububaho uko buri, ukabugira bwiza ntuheranwe n’amaganya…ubuzima  ni ubusa  kuko igihe  Imana ishakiye irabukwambura, ubuzima ni ukwishima kandi icyo ukoze ukwiye kwifuza ko cyakugirira akamaro ndetse n’abandi.

Ikikubabaje ugomba kugihindura ikigushimisha ukabubamo ariko ntubusandaze, ubane n’abandi ndetse mwishimane ariko ntiwiyandarike ngo ubusesagure maze igihe Imana yazabushaka ukabutwara ariko butararanze no kwigunga.

Reba unumve ikiganiro kigufi na Amabilis Sibomana

[youtube url=”https://www.youtube.com/watch?v=nbP_DaeE0-M” width=”560″ height=”315″]

Photos/Eric Birori/UM– USEKE

BIRORI Eric
UM– USEKE.RW