Israel na Palestine byumvikanye guhagarika imirwano igihe kinini

Kuri uyu wa 26 Kanama i Cairo mu Misiri, Israel na n’abanyepalestine bo mu mutwe wa Hamas bumvikanye guhagarika imirwano ku buryo bw’igihe kirekire nkuko bitangazwa na AFP. Iyi mirwano imaze igihe cy’ibyumweru birindwi isize ihitanye ubuzima bw’abantu 2 200.

Guhagarika imirwano byatangiye gushyirwa kuri uyu mugoroba kuva ku isaha ya saa kumi n’imwe ku isaha ngengamasaha ya GMT.

Abo mu gace ka Gaza bagaragaje ibyishimo ku mihanda bavuga ko guhagarara kw’imirwano kuri bo ari intsinzi kubera igihe bamaze bihagazeho ku bitero bya Israel.

Bumvikanye ariko kandi gusubizaho ikitwa “blocus de Gaza” cyashyizweho mu 2006 kibuza agace ka Gaza guhabwa intwaro. Gusa ariko Israel yemeye koroshya uburyo bwo kugeza ibiribwa n’ubundi bufasha bwo kubaka ibyashenywe muri Gaza.

Ibiganiro hagati y’impande zombi birakomeza i Cairo mu Misiri aho Israel yo ikomeje gusaba ko imitwe yitwara gisirikare muri Gaza igomba gushyira intwaro hasi.

Ubwumvikane bwagezweho kuri uyu wa kabiri mu masaha amwe n’ayo impande zombi zariho zohererezanya ibisasu.

Igisasu cya nyuma cyoherejwe muri Israel kuri uyu mugoroba cyishe umusivile umwe w’umunya Israel gikomeretsa abandi batandatu nk’uko umuganga w’urwego rwa Eshkol Regional Council yabibwiye BBC.

Mu gitondo kuri uyu wa kabiri ariko kandi abanyePalestine batandatu nabo bishwe n’ibitero byo mu kirere bya Israel.

UM– USEKE.RW