Drogba yongeye kuba hamwe na Mourinho muri Chelsea

Nyuma y’imyaka ibiri aho yaciye mu Bushinwa na Turkiya mu makipe ya Shangai Shenua na Galatasaray, Didier Drogba yongeye kubana na mucuti we Jose Mourinho mu ikipe ya Chelsea y’i Londres. Kuri uyu wa 25 Nyakanga nibwo yasinye amasezerano y’umwaka umwe. 

Drogba yagize ibihe byiza aha agarutse, yahatwaye ibikombe bitatu bya shampionat, bine bya FA na kimwe cya Champions Ligue.

Jose Mourinho mu 2004 niwe wari wamuzanye muri Chelsea amukuye muri Marseille mu Bufaransa, araza aca ibintu, mu 2012 amaze kugira imyaka 34, ubwo Mourinho yari yaragiye muri Espagne Drogba baramusezereye, Mourinho akaba yongeye kumugarura ku masezerano y’umwaka umwe yasinye none.

Drogba yatangaje ko bitashobokaga ko yanga amahirwe yo kongera gukorana na Mourinho.

Ati “Ntibyashobokaga ko nanga amahirwe yo kongera gukorana na Jose. Buri wese azi ubucuti budasanzwe mfitanye n’iyi kipe nakomeje kumva ko ari mu rugo.”

Mu rugamba rwo kumugarura Mourinho yashimangiye ko Drogba akifitemo ubuhanga mu gutaha izamu mu beza ku Isi.

Ati “Aje kuko ari mu ba mbere i Burayi. Nzi neza uko ateye kandi nziko ataje kubera amateka cyangwa ibyo yakoze hano. Aje kongeraho ku mateka.”

Drogba aje asanga abandi ba rutahizamu nka Diego Coasta baherutse gusinyisha, Fernando Torres na Romelu Lukaku nubwo aba bombi bivugwa ko bari ku muryango usohoka.

Umupira wa nyuma Drogba yaherukaga gutera nk’umukinnyi wa Chelsea ni Penaliti yabahesheje igikombe cya UEFA Champions League tariki 19 Gicurasi 2014 ubwo batsindaga Bayern Munichen ku mukino wa nyuma kuri za Penaliti. Ni nyuma kandi y’uko yari yatsinze igitego cyo kwishyura mu minota ya nyuma y’umukino wahise urangira ari 1 – 1.

Drogba asanze abo bahoranye nka Frank Lampard yaragiye muri New York City, Ashley Cole yaragiye i Roma, Petr Cech nawe ari mu nzira abisa uwitwa Thibaut Courtois umeze neza agaruka muri Chelsea. Icyakora mubo asanze bahoranye harimo John Terry ugikanyakanya.

Drogba ni umwe muri ba rutahizamu ba myugariro benshi bumva izina bagakangarana ku Isi.

UM– USEKE.RW