Basket: u Rwanda rwatsinze Togo, rubona ticket ya 1/16

Ikipe y’igihugu ya Basketball yatsinze Togo ku manota 87 – 67 ya Togo, mu mukino warangiye ahagana saa sita zo kuri uyu wambere muri Madagascar.  Abasore b’u Rwanda bazakina na Cote d’Ivoire muri 1/16 kuwa kane.

Nyuma yo gutsindwa na Centre Afrique mu ntangiriro z’amarushanwa y’Africa ya Basket ari kubera Antananarivo muri Madagascar, umukino wakurikiyeho Tunisia yatsinze  u Rwanda 69-37 kuwa gatandatu.

Nyuma yo gutsindwa imikino 2, abakinnyi n’umutoza bakoze inama bafata imyanzuro y’uko bagomba gukora ibishoboka byose bakitwara neza kuri match ya Togo, ari nayo yambere babashije gutsinda.

Gasana Keny  niwe watsinze  amanota menshi, 19, Robert Thompson  18pts, Bradley Camron atsinda 15,  ndetse na Matt Miller arenza 10pts, nkuko tubikesha bamwe mu bari kumwe n’iyi kipe.

Kuwa kane muri 1/16, itsinzwe ihita ivamo (Knockout stage), u Rwanda rwa 3 mu itsinda D, ruzahura na Cote d’Ivoire yabaye iya kabiri mu itsinda C.

Cote d’Ivoire mu itsinda ryayo nayo yatsinzwe imikino 2 nk’u Rwanda, itsinda umwe. Yatsinze South Africa 105–53,  ariko nayo itsindwa na Egypt na Cameroun byari mu itsinda rimwe.

UM– USEKE.COM