Akandi gahinda kuri Arsenal, 0-2 Liverpool

Undi munsi mubi kuri Arsenal murugo ni ugutsindwa na Liverpool 2-0, ibi bije byiyongera ku bihe bibi Arsenal irimo, byo gutakaza Captain wabo ajya muri Barcelona, ndetse na Nasri uri ku muryango asohoka.

Arsenal gutsindwa muri iyi week end byongereye agahinda ku bafana bayo, bakirakariye umutoza Arsene Wenger, bemeza ko ntacyo ari gukora muri iki gihe cyo kugura abakinnyi.

Mu mukino utoroshye ku mpande zombi, Arsenal yabonye uburyo bumwe na bumwe bwo kureba mu izamu rya Pepe Reina wa Liverpool, captain Van Persie ubwo yabonye bwari bwabazwe ntiyabukoresha neza.

Arsenal yaje kugorwa cyane n’ikarita ya kabiri y’umuhondo yahawe Emmanuel Frimpong ku munota wa 70, mu gihe uyu musore yari mubakinaga neza hagati kandi bagifite imbaraga, ibi byatumye hagati hapfa ku buryo bugaragara.

Ingaruka zabyo ni ibitego 2 byinjiye nyuma yo gusohoka kwa Frimpong, ku munota wa 78 Aaron Ramsey yitsinze igitego, maze kuwa 90 nyuma yo guhererekanya neza kwa Liverpool Luis Suarez ashyiramo icya 2 cyarangije ibintu.

Arsenal kandi kugeza ubu ntirizera neza ko izagumana umukinnyi wayo Samir Nasri ushakishwa cyane na Manchester city, uyu abafana ba Arsenal bavuga ko Wenger atari gushaka uzamusimbura kugeza ubu.

Arsenal itsinzwe uyu mukino iri mu rugo mu gihe ku cyumweru gitaha izajya gusura Manchetser United i Old Trafford (17:00 mu Rwanda), ku munsi wa gatatu wa English Barclays Premier Ligue.

UM– USEKE.COM