Kuva muri U17 ukajya mu ikipe y’igihugu nkuru? ntaho byabaye

“Ihene nziza ntawuyizirika ku ihene mbi”

Nkunda kwibaza byinshi kuri siporo yo mu Rwanda, cyane cyane nyine ikunzwe na benshi ariyo ruhago.

Nkibaza aho mu byukuri igana, nkibaza ku ikipe y’igihugu nkuru bamwe bajya bita “Nyakatsi”, nkibaza ku batarengeje imyaka 20, nkibaza kubatarengeje imyaka 23 (equipe olympique), ndetse nkanibaza ku bahoze bakinira U 17, baduserukiye muri Mexique.

Njye mperutse kwibaza ku imbere (future) ha bariya bana binjijwe imburagihe mu ikipe y’igihugu nkuru numva biranshobeye, kandi birambabaje cyane. Kubera iki rero?

Nagerageje gukora ubushakashatsi bungana n’ubushobozi bwanjye, mu bihugu dukunda kureberaho ibya ruhago, ntaho nasanze byabaye ko umwana ava mu ikipe y’abatarengeje imyaka 17, akajyanwa mu ikipe nkuru y’igihugu.

Ariko ibi biherutse kuba mu rwacu Rwanda, aho Emery Bayisenge (unifitiye imvune ubu), Nzarora Marcel, Charles Tibingana na Andrew Buteera (Aba bo numvise ngo kuri uyu wa gatanu bageze i Kigali baje mu mavubi) aba basore bazamuwe mu ikipe nkuru ndumirwa, ndanababara.

Ukibyumva wakwibaza ko ntakibazo, ndetse ari ukubagirira neza bamenyera abakuru, ariko njye nsanga atari uko biri.

Mbona ari ukwica urugendo rw’umukinnyi muto (U17), bakimara kubashimira nyuma y’igikombe cy’isi, Ministre Mitali Protais numvise kuri radio avuga ko, kuva ubwo babaye U20, ariko urugendo rwa bano bana 4 rurirukankijwe biteye ubwoba ntibanakinnye muri U 20, ntibakinnye U 23, nubwo bashobora kuzayakinira, ariko bahise binjizwa muri “Nyakatsi”

Aba bakinnyi kwinjizwa mu ikipe y’igihugu nkuru, icyambere, mbona barabakuye mu kigero (Promotion) y’abandi bari kumwe, ku bazi kubaka ibigero (promotions) mu mupira murabizi cyane kundusha.

Icya kabiri, bariya bana bagiye mu ikipe nkuru y’igihugu guhura n’Amarozi ahavugwa (yirukanishije Eric Nshimiyimana, yenda yo yarahasigaye, cyane ko nta gihamya yamufashe), bahure n’umuco wo gukinira prime kurusha gukinira igihugu, bahure n’umuco w’abahashyi bamwe na bamwe bazahahurira, bahure no kwiyumva ko “wakomeye kurenza”, n’ibindi mpamya ko batahuye nabyo muri U 17.

Sinshaka kuvuga ko ntaho bari kuzahurira nabyo, ariko babyinjijwemo imbura gihe. Si ibi gusa kuko ingufu, imikaya, no gukomera kw’amagufwa y’abakinnyi b’Amavubi makuru, ntaho bihuriye nibya BAYISENGE wavutse mu 1994 cyangwa BUTEERA, ibi bivuze ko imvune muzumva bagiriye hariya ntaho ihuriye niyo bagira bagonganye na bagenzi babo bari mu kigero kimwe.

Nanzura aka gahinda nkeka ko ntisangije, natewe no kuzamura aba bana nafata nkabacukijwe imbura gihe, nasaba ko ibi byakozwe byakosorwa, abana bagasubizwa mu bandi, bakazamukira rimwe uko bari kumwe, bakazakora Amavubi makuru igihe cyabo kigeze.

Hari abavuga ngo “Ihene nziza ntawuyizirika ku ihene mbi” none se kubashyira mu mavubi yanyuma ubu mu itsinda arimo, nibwo bagiye kwiga umupira kurushaho?

Bayobozi ba ruhago mu Rwanda, ndavuga afande Kazura, Julles Kalisa n’abandi mufatanyije, njye ndabisabiye nti: “Ariya mavubi makuru nimuyareke agende nubundi ari kurembera, ntacyo twe, kandi namwe, twayabonyemo. Mwishimire kandi natwe twishimiye ko hari abari guhinguka, ariko mwibavanga, ntacyo bajya kubakuramo”

Ibyo ni ibyo ntekereza, niba utekereza ibirenze ibi byanjye urebe uko udusangiza, Umuseke namwe iki gitekerezo cyanjye ntimukinige, mukireke gitambuke.

Umusomyi w’UM– USEKE.COM
Yves Bugabo, i Gicumbi