Ababazwa n’uko nyinawabo basigaranye ariwe wamwambuye imitungo y’ababyeyi be

* Ingabire Clarisse yasigaye wenyine, isambu y’iwabo nyinawabo niwe wayiyanditseho
* Umutesi, nyinawabo,yaramureze nyuma aramwirukana ngo ni ikirumbo
* Uyu nyina wabo avuga ko se w’uyu mukobwa yari umupagasi wateye inda mukuru we
* Komisiyo yashinzwe ikibazo kwa Ministre w’Intebe yategetse ko umwana asubizwa iby’iwabo
* Inzira z’amategeko ziramugoye (Ingabire) kubera ubushobozi bucye
* Nyinawabo yabwiye Umuseke ko umwana azihanagure

Hari byinshi u Rwanda rumaze kwibohora mu myaka 20 ishize, ariko kimwe mu bibazo u Rwanda rugihanganye nabyo harimo icy’impfubyi za Jenoside, imitungo y’imiryango yazo n’imibereho yazo. Ibibazo bimwe biteye bitya biracyakomereye inzego, n’imiryango. Ingabire Clarisse warokotse Jenoside wenyine mu rugo iwabo, amasambu y’iwabo yatwawe na nyinawabo basigaranye akamwirukana. Ubushobozi bucye butumye atabasha gukomeza kubyiruka inyuma n’ubwo urwego rwa Ministre w’Intebe rwari rwategetse ko uyu mwana asubizwa iby’iwabo.

Ingabire Clarisse akomoka mu karere ka Gisagara umurenge wa Kibirizi, Akagali ka Kibirizi ,Jenoside yabaye afite imyaka  itanu, ababyeyi be bombi n’abavandimwe be bane batwikirwa hamwe mu nzu, we arokoka ku bw’Imana, asigara ari igisenzegeri ahishwa n’umusazi w’aho i Kibirizi kugeza Jenoside irangiye.

Nyuma ya Jenoside kuva mu 1998 Ingabire yarezwe na nyinawabo Umutesi Valentine nawe warokotse, ni umucuruzi mu mujyi wa Kigali, babanaga mu Cyahafi i Nyarugenge.

Uko umwana yagiye akura niko yamenyaga ko iwabo bari bafite amasambu n’ishyamba i Kibirizi, nyinawabo ariko nawe ngo akaba yarashakaga aya masambu, Ingabire avuga ko umwuka mubi hagati yabo watangiye ubwo uyu nyina wabo yashatse kugurisha aya masambu n’ishyamba kuri miliyoni imwe n’igice umwana ngo akabimenya. Ntibikorwe.

Kuva ubwo Ingabire avuga ko nyina wabo yatangiye kumubwira amagambo amukomeretsa kugeza ubwo amwirukanye mu rugo  aho bari batuye mu Cyahafi, Ingabire yibuka ko yirukanwe mu rugo rwa nyina wabo tariki 21 Gashyantare 2006. Atangira ubuzima bugoranye cyane bwo kubara ubucyeye no kuba ku ishuri mu biruhuko muri Groupe Scolaire ya Muhondo i Gakenke aho yigaga. Nyinawabo avuga ko yirukanye uyu mwaka kubera ko ngo yari atangiye kuba ikirumbo.

Umutesi Valentine niwe wasigaye agenzura aya masambu n’ishyamba bya Hegitari eshatu, ndetse ubwo hari haje gahunda yo kwandikisha ubutaka abyiyandikishaho, uyu mwana w’umukobwa we ibyo ntiyari abizi kubera ubuzima bugoye yariho abamo.

Aho hugukiye, Ingabire yiyambaje inzego zitandukanye, Akarere ka Gisagara, Umurenge w’iwabo, FARG, CNLG, IBUKA n’izindi nzego ngo zimurengere. Akanama kashyizweho na Minisitiri w’Intebe  kumvise ibisobanuro bye ubwo kajyaga ku Gisagara, gategeka ko uyu mwana w’impfubyi asubizwa imitungo y’iwabo. Gasiga kabwiye inzego z’Umurenge, Akarere na Polisi gufasha uyu mwana agasubizwa iby’iwabo. Umwaka urarenze ntabyo arahabwa, nyina wabo niwe ukibyaza umusaruro ayo masambu amwanditseho, umwana wa mukuru we aracyagorwa n’ubuzima.

Ingabire yabwiye Umuseke ko nyina wabo Umutesi wamureze akamwirukana yiyandikishijeho imitungo akwiriye ariko akaniyandikishaho imitungo yo kwa mukuru we (nyina wa Ingabire) n’umugabo we.

Uyu mwana yaje guhaguruka ajya iwabo, ku murenge bamutegeka kwandika ibaruwa ngo bazabikosore bamubwira ko bazabimukurikiranira  ariko n’ubu amaso yaheze mu kirere.

Hajemo ikibazo, babanza gushidikanya ko uyu mwana yabyawe koko n’uwo yita ko ari se ari nawe wari ufite ayo masambu mbere ya Jenoside, ariwe koko cyane ko ngo nyina na se batari barasezeranye.

Muri 2012 Ingabire yagiye kuburanira ibyo bita “Judgement d’Actes de Naissance” kigaragaza koko se ari uwo bavuga wari ufite amasambu, umwana aratsindwa abura ubushobozi bwo kujurira.

Muri 2013 CNLG yamutangiye ikirego cy’uko imitungo ari iya se maze aratsinda ndetse bamushyira ku rutonde rw’abazasubizwa imitungo.

Muri Kamena 2013 Komisiyo yari yashyizweho na Minisitiri w’Intebe nayo yamanutse mu karere ka Gisagara imaze kumva ibisobanuro bye yanzura ko uyu mwana Ingabire agomba gusubizwa imitungo ye.

Iki kibazo cyashinzwe Akarere na Polisi ngo bifasha uyu mwana gusubizwa iby’iwabo.

Ingabire ati “Nahagiye inshuro esheshatu, bakansaba kuzana n’uriya mama wacu ariko namuhamagara akanga kwitaba. Vice mayor ushinzwe imibereho myiza niwe ubizi kuko nibo bahise bamanura ikibazo mu murenge wa Kibirizi ariko kugeza n’ubu ntacyo bakoze.”

Umunyamabanga Nshingwabikorwa w’Umurenge wa Kibirizi Rushema Jacques yabwiye Umuseke ko ikibazo bakizi koko.

Avuga ko kuva uwo mugore yariyandikishije ku mitungo bigoye kuba Ingabire yayisubizwa bitanyuze mu mategeko we avuga ko ari ikibazo abona gishobora no gufata igihe kinini cyane.

Rushema avuga ko yahamagaye uyu mugore (nyina wabo) maze akamubwira ko uwo mwana atamuzi.

Rushema avuga ko icyemezo cya burundi cy’amasambu avugwa cyafatiriwe ariko bitabuza Umutesi Valentine gukomeza kubyaza umusaruro ubu buataka.

Rushema ati “uriya mwana agomba kuza akabikurikirana bikanyuzwa mu matekeko nubwo inzego z’ubuyobozi zemeza ko imitungo ari iye (Ingabire)”

Ingabire amaze igihe gito abonye umuryango mushya umurera mu Nyakabanda i Kigali, ni umunyeshuri muri Kaminuza ya INATEK, avuga ko bimusaba amafaranga adafite guhora ku Gisagara akurikirana ikibazo cyafatiwe umwanzuro w’uko asubizwa imitungo y’iwabo.

Nyinawabo Umutesi Valentine yabwiye Umuseke ko nubwo mbere ya Jenoside iyi mitungo yabagamo se wa Ingabire koko ari iyo bari baramutije ubwo yazaga nk’umupagasi yarangiza agatera inda Nyina wa Ingabire ari nawe mukuru wa Umutesi.

Umutesi avuga ko bazakiranurwa na Leta kuko ngo uyu mukobwa atazwi muri iyi mitungo yita iya se naho iya nyina  ngo amwegereye yamuhaho ku bushake kuko ari nk’umubyeyi we (ni nyina wabo). Ariko akavuga ko ngo bitewe n’uko uyu mwana wa mukuru we yamwitwayeho ubu akwiye kwihanagura kuko ntacyo azamuha kuri iyo mitungo.

Umukecuru witwa Uwamaliya utuye i Kibilizi uzi neza uyu muryango yabwiye Umuseke ko imitungo umwana asaba ari iya se na nyina kuko bayibanagamo kuva cyera, ahakana ko uwo mugabo (se wa Ingabire) yaje nk’umupagasi nk’uko Valentine abyemeza. Gusa koko yemeza ko batari barashyingiranywe imbere y’amategeko nk’uko n’indi miryango myinshi mu byaro mbere ya Jenoside byari bimeze. Akibaza niba ari icyo uwo mwana azira.

Ingabire asa n’ufite icyizere gicye ku mitungo y’iwabo, nyamara inzego z’ubuyobozi zemeza ko imitungo umwana akwiye kuyisubizwa, gusa ngo biciye mu nzira z’amategeko, inzira z’amategeko zikaba ubu zidashobokeye uyu mwana kubera ubushobozi bucye afite.

Ikibazo nk’iki ni kimwe mubyo u Rwanda rugihanganye nabyo….

BIRORI Eric
ububiko.umusekehost.com

Ku wifuza gufasha Ingabire ikibazo cye yamubona kuri +250 782 645 711