Umunya Uganda yishimiye cyane guhabwa ubwenegihugu bw’u Rwanda

Kabuye  Ephrem  ukomoka  mu gihugu cya Uganda,  utuye  mu mudugudu wa Nyarucyamu ya mbere,  akagari ka Gahogo, umurenge wa Nyamabuye mu karere ka Muhanga,  yahawe ubwenegihugu bw’u Rwanda,  akavuga ko agiye gukurikiza  amategeko n’amabwiriza  agenga  abatuye igihugu cye gishya.

Kabuye Ephrem  akomoka mu karere ka Masaka muri Uganda,  amaze  imyaka itandatu aba  mu Rwanda,  yavuze ko  nyuma yuko ashakanye n’umunyarwandakazi yasabye kuba umunyarwanda kugirango we n’umguore we bagire uburenganzira bungana.

Kabuye avuga ko akunda cyane u Rwanda kandi yifuje cyane gushakana n’umunyarwandakazi, amaze kumushaka avuga ko yihutiye kuzuza ibisabwa maze asaba ubwenegihugu. Ashimira cyane uburyo serivisi yahawe zihuse kandi zakozwe neza.

Senyenzi Francois ushinzwe abinjira n’abasohoka  mu karere ka Muhanga, yavuze ko  basuzumye dosiye  ya Kabuye bayohereza mu nama y’Abaminisitiri  imwemerera  kumuha ubwenegihugu  cyane cyane  ishingiye  itegeko ngenga numéro  30/07/2008  ryerekeye  ubwenegihugu Nyarwanda uko busabwa ndetse nuko butangwa.

Kabuye akaba ubu ngo agiye guhabwa ibyangombwa byose byemerewe umunyarwanda mu Rwanda.

Mutakwasuku Yonne  uyobora Akarere ka Muhanga,   ashimira  Kabuye  ubushake yagaragaje bwo kuba umunyarwanda by’umwihariko no kubinyuza mu nzira amategeko ateganya.

Mutakwasuku avuga ko bamuhaye ikaze mu muryango mugari w’Abanyarwanda, anamubwira ko abanyarwanda bafite uburenganzira bungana imbere y’amategeko.

Itegeko nshinga rya Repubulika y’u Rwanda  ryemerera  ubwenegihugu umuntu wujuje ibi:  Kuvukira  ku butaka bw’ u Rwanda,   ubwenegihugu ku mwana utabyaye ariko wemera imbere y’amategeko (Adoption),  Kuba warashakanye n’umunyarwanda,  guha umunyamahanga ubisabye  ubwenegihugu  no kuba  warigeze  kuba umunyarwanda nyuma ugatakaza ubwenegihugu bwawe.

Kabuye  akaba yahawe ubwenegihugu  kubera ko yashakanye  n’umunyarwandakazi.

MUHIZI Elisee
ububiko.umusekehost.com/Muhanga