Ndayisaba Fabrice yateguye imikino yo kwibuka abana bazize Jenoside

Nyuma y’icyumweru hakinwa imikino yo kwibuka abana bazize Jenocide yakorewe Abatutsi mu mwaka w’1994 kuri iki cyumweru tariki ya 22 Kamena nibwo hakinwe umukino wa nyuma ,ikipe ya NFF inyagira High hills Academy ibitego 4-0.

Ni amarushanwa yitabiriwe n’abakinnyi b’abana bari munsi y’imyaka 16 wabonaga bafite ishya, bakina umupira uryoheye ijosho ariko ikipe ya NFF yaje kubyitwaramo neza itsinda ikipe ya High Hills Academy ibitgo byose 4-0.

Nyuma yo gutanga igikombe, Ndayisaba Fabrice umuyobozi w’Ishyirahamwe rya NFF (Ndayisaba Fabrice Foundation) yabwiye Umuseke ko yatekereje gutegura iyi mikino yo kwibuka abana bazize Jenocide kuko yabonaga ibindi byiciro byibukwa ariko akabona abana bo batibukwa by’umwihariko.

Ndayisaba Fabrice ati “Nibyo birangora ariko ababyeyi b’aba bana baba muri NFF (Ndayisaba Fabrice Foundation) bagerageza kumfasha ngo dukore iki gikorwa kuko biri ngombwa.”

Fabrice akomeza avuga ko icyifuzo cye ari uko byazava mu karere ka Kicukiro bikaba mu gihugu hose.

Yagize ati “Ubu turabikora ariko ntiturabona ubushoboze ngo twibuke abana bazize Jenoside yakorewe Abatutsi mu 1994 birenze imbizi z’akarere ka Kicukiro ngo tujye no mu gihugu hose aho abana bari twifatanye mu kwibuka bagenzi bacu bazize Jenocide.”

Uyu mukino wari witabiriwe n’abantu b’ingeri zitandukanye biganjemo abana, ndetse igisonga cya kabiri cya Nyaminga w’u Rwanda, Umutoniwase Marlene na we wari uhari yafatanyije n’umutoza w’ikipe ya APR FC Mashami Vincent kuwutangiza.

Iri rushanwa ryari ryitabiriwe n’amakipe ane gusa ariyo Kagarama Secondary School, Ndayisaba Fabrice Foundation, B.S.Nyanza na High Hill Academy.

Nkurunziza Jean Paul
ububiko.umusekehost.com