Ngo nta kindi afite cyo kwitura ingabo z’u Rwanda uretse isaluti

Karongi –  17 – 06 – 2014, Abaturage bo mu murenge wa Gishyita baganiriye n’umunyamakuru w’Umuseke bamubwiye ko bashimishwa cyane no kuba bafite umutekano bahabwa n’ingabo z’u Rwanda bikaba akarusho iyo hiyongereyeho ibikorwa bireba ubuzima bwabo bwa buri munsi. Umukecuru Mukagasana avuga ko ntakindi yatura ingabo z’u Rwanda uretse kuziha icyubahiro kugeza atabarutse.

Aba baturage bagaragaje ibyishimo bacinya akadiho hamwe n’ingabo z’u Rwanda nyuma y’igikorwa cyo gushyira ibuye fatizo aho bazubakirwa n’ingabo ikigo cy’ubuzima cya Gishyita, mu bikorwa by’ingabo bya “Army week” bitegura umunsi wo Kwibohora.

Aba baturage bavuga ko iki kigo nicyuzura kizaborohereza mu ndendo bakoraga bajya kwa muganga i Karongi mu mujyi.

Ndagano Vianey wari muri aba baturage ati “Impamvu ubona twishimye cyane ni uko ibintu ingabo zikora tuba tuzi neza ko byihuta. Ubu iki kigo ejo bundi kizaba cyuzuye ababyeyi bari kuhabyarira.”

Mukagasana twafashe ifoto atera isaluti nk’icyubahiro ngo afite cyo guha ingabo z’u Rwanda ati “Urabona ndashaje, ntacyo ntabonye urebye. Ariko abasirikare bacu ni abagabo pe, baturindira umutekano tukaryama tugasinzira, uko ngana uku mperuka kumva amasasu my myaka nka 20 ishize, none dore baje no kutwubakira ibitaro hano, bakwiye icyubahiro gusa kubashimira ntacyo twabona cyo kubahemba.”

Umwe muri aba baturage avuga ko ikizere cyo kuba iki kigo kizuzura vuba yagize ati “ Hariya mu Bwishyura bahubatse amazu y’abatishoboye b’abademobe, bayubatse mu gihe gito cyane, ubu rero ubwo batangiye iki kigo nacyo ejo uzagaruka usange niho twivuriza.”

Lt Gen Fred Ibingira umugaba w’ingabo z’inkeragutabara z’u Rwanda wari muri uyu muhango yabwiye aba baturage ko icyambere kiruta ibindi mu gihugu ari umutekano n’amahoro by’abagituye.

Ati “Mwumva amagambo ku maradio no mu binyamakuru bavuga byinshi basebya u Rwanda. Ariko byose nta na kimwe cyagirira akamaro abanyarwanda. Nimureke turebe ibiduha amajyambere, ibiduha ibigo nderabuzima, ibiduha amashuri, ibiduha imihanda, ibiduha amazi meza n’amashanyarazi tukagira ingo nziza n’ubuzima bwiza. Abavuga amagambo yandi ntimubahe umwanya, nimubumbatire ubumwe n’umutekano ibi tuzabigeraho.”

Lt Gen Fred Ibingira avuga ko ibintu byose umuntu ashobora kubigeraho mu gihe afite amahoro n’umutekano. Avuga ko ingabo z’u Rwanda zishishikajwe cyane n’ubuzima bwiza bw’abanyarwanda mu gihe bafite amahoro ari nayo mpamvu baje muri ibi bikorwa byo kububakira ikigo cy’ubuzima ahabegereye.

Dr Anita Asiimwe Umunyamabanga wa Keta muri Ministeri y’ubuzima wari muri uyu muhango avuga ko ubufatanye bw’abaturage mu gikorwa nk’iki cyo kubaka ‘poste de santé’ ari ko gaciro k’abanyarwanda abayobozi bavuga.

Dr Asiimwe yabwiye abaturage ko kwihesha agaciro ari uguharanira kubaho neza. Ati “Ntabwo wagira agaciro mu gihe nta mituel de santé ufite.”

Asaba abaturage gushyira imbaraga mu kwiteza imbere no kugira ubuzima bwiza mu gihe bafite n’umutekano n’amahoro birambye.

Photos/DS Rubangura/UM– USEKE

Daddy Sadiki Rubangura
ububiko.umusekehost.com