Musambira: Umwe yitabye Imana mu mpanuka ya Fuso na Coaster

Umuntu umwe wari mu modoka ya coaster ya kompanyi itwara abantu ya Volcano niwe wasize ubuzima mu mpanuka y’iyi modoka yagonganye n’indi ya Fuso mu mvura yaguye ku mugoroba wo kuri uyu wa 16 Kamena 2014 mu murenge wa Musambira mu kagari ka Buhoro mu karere ka Kamonyi. Abantu 21 barakomeretse.

Imodoka ya Fuso yaturukaga mu majyepfo igongana n’iyi modoka itwara abagenzi yerekezaga i Muhanga ivuye i Kigali nk’uko bitangazwa na KigaliToday.

Abari muri Coaster  bavuga ko iyo modoka ya Fuso ariyo yabagonze kuko yataye umukono wayo ikabasatira. Abaturiye umuhanda bihutiye gutabara abakomerekeye muri iyi mpanuka.

Mu mvura yariho igwa nibwo izi modoka zagonganye, bigaragara ko zagonganye zihuta cyane urebye uko zangiritse.

Abakomeretse boherejwe mu bitaro bya Remera-Rukoma biri hafi, i Kabgayi no mu bitaro bya CHUK i Kigali.

ububiko.umusekehost.com