Mario Balotelli yasabye umukunzi we ko babana,mbere y’igikombe cy’Isi

Urukundo rwabo rwavuzweho byinshi ko rujegajega ariko noneho umenya rwarakomeye, mbere gato y’igikombe cy’Iisi Mario Balotelli yambitse impeta ya ‘Fiançailles’ umukunzi we Fanny Neguesha ibanziriza abifuza kurushinga akaramata.

Ikipe ye y’Ubutaliyani izacakirana n’Ubwongereza ku mukino ubanza mu itsinda rya D barimo   n’ibihugu bya Uruguay na Costa Rica, Mario Balotelli akaba asa n’utuje muri iki gihe gitambutse mu mibanire ye na Fanny.

Kuwa mbere nibwo uyu rutahizamu wa AC Milan yatangaje ko uyu mukunzi we, bamaze igihe bagerageza gukomeza urukundo rwabo, noneho yemeye, yabigaragaje mu ifoto y’uyu mukunzi we y’ikiganza cyambaye impeta ahabugenewe.

Munsi y’ifoto haherekejwe n’amagambo agira ati “‘She said yes.. The most important yes in my life. That was the place of my question! I Love you and happy birthday too! Je t’aime my WIFE”

Yagaragaje kandi indi foto ari kumwe n’uyu mukunzi ahitwa Mangarabita, aho ikipe y’Ubutaliyani yakoreye imyiteguro y’igikombe cy’isi. Biravugwa ko ari aha yaba yamusabiye urukundo rufite gahunda.

Mu minsi yashize urukundo rwabo rwagiye ruzamo ibibazo ndetse ku mbuga nkiranyambaga Fanny Neguesha, bivugwa ko afite inkomo muri Congo, Rwanda na Misiri, agatangaza ko ari ‘single’.

Gusa Balotelli ubusanzwe ngo ufatwa nk’umusore w’amashagaga n’amahane, akaba ngo yarakomeje gutereta uyu mukobwa kugeza ubu amubwiye ati “Yes”.

Balotelli ariko afite umwana yabyaye mu 2012 ku wundi mukobwa bakundanye witwa Raffaella Fico, nubwo yari yabanje guhakana uyu mwana no kwemera ko azamurera nasanga ari uwe koko, mu kwezi kwa kabiri 2014 nibwo ibisami bya ADN byagaragaje ko umwana ari uwe.

ububiko.umusekehost.com