REMA iranenga uturere tutita ku bidukikije

Tariki ya 5 Kamena buri mwaka, u Rwanda n’Isi byizihiza umunsi mpuzamahanga wahariwe kwita ku bidukikije, uyu munsi Igigo cy’igihugu cyita ku bidukikije (REMA) ikaba yahembye abantu ku giti cyabo, uturere, imiryago itegamiye kuri Leta ndetse na za Koperative b’indashyikirwa mu kwita ku bidukikije.

Umuyobozi wa REMA, Dr. Mukankomeje Rose yanenze tumwe mu turere twatereye agate mu ryinyo mu kutita ku ibungabungwa ry’ibidukikije.

Insanganyamatsiko y’umunsi wahariwe kwita ku bidukikije muri uyu mwaka ni “Rangurura Ijwi Duhangane n’Ingaruka z’Imihindagurikire y’Ibihe Amazi Atararenga Inkombe.”

Dr. Rose Mukankomeje yashimye uturere tuza ku isonga mu kubungabunga ibidukikije, anenga utudakoresha isuzumangaruka ku iyangirika ry’ibidukikije.

Umuyobozi wa REMA yasabye uturere kurangurura ijwi bakita kubidukikije ndetse bakajya bashyira mu mihigo ingamba zo kubungabunga ibidukikije cyane ko ariyo soko ubukungu bwubakiyeho.

Mukankomeje avuga kandi ko ibibazo byo gukusanya no gutunganya imyanda nabyo bikiri ingorabahizi bityo abantu bakaba bakwiye kongeramo ingufu.

Umuyobozi wa One UN mu Rwanda, Lamin Manneh avuga ko isi yose ikwiye gufatana urunana mu guhangana n’ihindagurika ry’ikirere ndetse anagaragaza zimwe mu ngaruka ziterwa n’ihindagurika ry’ikirere harimo imyuzure, amapfa, isuri, ukwiyongera kw’ibiciro, kurumba kw’imyaka byose bigenda bigatera ubukene abatuye isi.

Umunyamabanga wa Leta Muri MINILENA, Imena Evode we yatangaje ko akenshi ingaruka z’imihindagurikire y’ibihe zigera ku bihugu bito cyane ibikora ku nyanja. Nawe avuga ko u Rwanda na rwo nk’igihugu kidakora ku nyanja ruzi ingaruka ruhura nazo mu kwiyongera k’ubushyuhe.

Ibi byose bikaba ngo biteza amapfa bikagira n’ingaruka ku mazi n’ubutaka, ubukungu bw’Abanyarwanda bugahomba kuko umubare munini ari uw’abahinzi n’aborozi.

Avuga ko abantu bakwiye kuzirikana ko n’ubwo ubu bukungu butiyongera ariko abantu biyongera, mu turere twakoze neza mu kwita ku bidukikije, Gisagara ni yo yahize utundi twose ikaba yahawe igihembo.

BIRORI Eric
ububiko.umusekehost.com