Ishyirahamwe ry’iteramakofe mu Rwanda ryacitsemo kabiri

Impuzamashyirahamwe y’imikino Olimpiki mu Rwanda iravuga ko yo yemera ishyirahamwe ry’umukino w’iteramakofe mu Rwanda risanzweho ryitwa RABA.  Ariko amakimbirane ari amaze iminsi mu ishyirahamwe ry’umukino w’iteramakofe  yatumye ricikamo ibice bibiri havuka irindi. Ubuyobozi bw’Impuzamashyirahamwe bwo bwatangaje igice cyemewe kuyobora iri shyirahamwe.

Elie Manirarora, Visi-Perezida akaba n’umuyobozi ushinzwe amashyirahamwe muri Komite Olempike y’u Rwanda yabwiye itangazamakuru ko bo nk’urwego rushinzwe amashyirahamwe y’imikino Olimpike batazi ibice bibiri biyobora ishyirahamwe ry’umukino w’iteramakofe.

Manirarora yemeza ko habaye Inteko rusange y’ishyirahamwe ry’umukino w’iteramakofi yabereye mu biro bya Komite Olempike bategura amatora, yaje kuba tariki 20 Mata, hatora amakipe atanu mu makipe umunani agize iri shyirahamwe kandi amatora yageze neza.

Ati “Ibyo byiciro bibiri twe ntabyo tuzi, amatora yarabaye kandi natwe twari duhari na nyuma y’amatora twahawe raparo. Gusa nyuma gato twabonye indi baruwa ivuga ko hari irindi shyirahamwe ry’uyu mukino ryavutse ariko ntaryo tuzi kuko atari umunyamuryango wacu.”

Abajijwe muri izo komite ebyiri iyo bemera ko ishinzwe umukino w’iteramakofi mu Rwanda, yavuze ko ishyirahamwe bazi ari iryitwa RABA(Rwanda amateur boxing federation) ryari risanzweho riyoborwa na Jocob Murindangabo.

Yagize ati “Twe tuzi RABA kuko ariyo isanzwe ari umunyamuryango wacu,… dufite abanyamuryango 28 nta rindi shyirahamwe twigeze twemerera kuba umunyamuryango. Ntibibaho ko amashyirahamwe abiri y’umukino umwe abaho mu gihugu kimwe.”

Uko ikibazo giteye

Ishyirahamwe ry’umukino w’iteramakofi mu Rwanda (RABA)riherutse gutegura Inama y’inteko rusange iyobowe n’uwahoze ayobora iri shyirahamwe.

Ku murongo w’ibyigwa hari bushyirweho itariki ya amatora ndetse banayemeranyaho, umunsi w’amatora ugeze mu makipe umunani y’amanyamuryango amakipe atanu niyo yaje mu matora gusa, andi atatu.

Amakuru akavuga ko ayo makipe atatu ataraje mu matora ngo ashobora kuba yarishyize hamwe agashinga irindi shyirahamwe aryita “Rwanda Olympic boxing federation (ROBF)” nabo bakora amatora, bashyiraho uwitwa Shyaka Kanuma ngo ayobore iri shyirahamwe rishya.

Jean Paul Nkurunziza
ububiko.umusekehost.com