EWSA yahaye inka umuryango w’umukozi wa ELECTROGAZ wishwe muri Jenoside

Abakozi  ba EWSA ishami rya Ruhango kuri uyu wa 21 Gicurasi baremeye umuryango warokotse jenoside yakorewe abatutsi mu 1994  uyu muryango wasizwe na Kamanzi  Charles  wakoreraga icyahoze ari ELECTROGAZ ubu kitwa EWSA.

Mu rwego rwo kwibuka  ku nshuro ya 20  jenoside yakorewe Abatutsi mu 1994  ndetse no kwifatanya n’abarokotse muri iyi minsi 100  yahariwe kwibuka,  abakozi ba EWSA  ishami rya Ruhango batekereje kuremera  abasizwe na Kamanzi Charles.

Bamwe muri aba bakozi bakoranye na Kamanzi bavuga ko kuba atakiriho bitababuza kuzirikana umuryango we yasize kandi yarakunze ariko akicwa muri Jenoside yakorewe Abatutsi.

Aba bakozi bavuga ko imirimo  Kamanzi yasize akoze n’ubu bakiyibuka kandi ko itazibagirana, bityo ko bagombye kwereka abo yasize ko bakizirikana umubyeyi wabo ndetse n’umukozi mugenzi w’aba ba EWSA.

Mukarubibi  Jacqueline  umupfakazi   wasizwe na Kamanzi yavuze ko bimushimishije  kuba  abonye inka  izamufasha kurera abana b’impfubyi yasigiwe na nyakwigendera.

Ati “ibi binyeretse ko ntari jyenyine  ahubwo  mfite abandi bantekereza.”

Sana Hyacinthe wavuze mu izina ry’abakozi ba EWSA ishami rya Ruhango ,yavuze ko   Interahamwe zinjiye mu kigo bakoragamo zigasanga we (Sana) asohotse ariko ko ibyabaye  yabikurikiraniraga  hafi kuko yari yihishe  muri metero zitarenga 100.

Ati “ Kamanzi  Interahamwe zamwishe numva ariko ntacyo nashoboraga gukora kuko nanjye nari mu bahigwaga.

Bamwe mu baje kutwica  n’abantu n’ubundi twari tuziranye,  baje bari kumwe n’abasirikare ba kera bica Kamanzi Abatutsi basigaye bajya kubicira  i Kibingo’’

Mbabazi  Francois Xavier  Umuyobozi w’akarere ka Ruhango yashimiye  abakozi EWSA  bashyize mu bikorwa gahunda y’umukuru w’igihugu Paul Kagame, watangije  gahunda ya gira inka aremera  imiryango itishoboye harimo n’abarokotse Jenoside bafite amaikoro make, avuga ko bikwiye kubera urugero rwiza n’abandi.

Uyu mupfakazi wasizwe na Kamanzi  Charles   yasigaranye  abana abatanu  Leta  yamwubakiye  inzu. Iyi nka ahawe ifite agaciro  k’ibihumbi 125.500 Mukarubibi yavuze ko  azayifata neza kubera ko afite isambu ihinzemo ubwatsi.

Muhizi Elisée
ububiko.umusekehost.com/Ruhango