Luc Eymael agiye gusubira muri AFC Leopards yahozemo

Nyuma yo gusesa amasezerano n’ikipe ya  Rayon Sports, uyu mu biligi w’imyaka 54 agiye gusubira  mu ikipe ya AFC Leopards yo mu gihugu cya Kenya yahozemo nk’uko Supersport ibitangaza.

Abayobozi ba AFC Leopards bamusabye gusesa amasezerano yari afite muri Rayon Sports akajya gutoza  ikipe  ifite abafana benshi bakunze kwita “Ingwe”,  badeheruka insinzi nk’uko Supersport ibitangaza.

Umwe mu bayobozi ba AFC Leopards utatangajwe izina rye yavuze  ko batifuje ko umutoza  witwa Trevor Morgan  usanzwe atoza iyi kipe yakomeza gutoza mu mikino ya shampiyona yo kwishyura(phase retour).

Ubwo igice kibanza cya shampiyona cyasozwaga, ubuyobozi bwa AFC Leopards bwahise busezerera uyu Morgan, ikipe ubu ikaba imaze ibyumweru bitatu itozwa na Juma Abdalla by’agateganyo.

Yagize ati “Eymael  turi kuvugana kandi nawe arashaka  kugaruka ngo akomereze aho yari agejeje  kandi nta kitubuza kumwemerera kugaruka muri iyi kipe azi neza.”

Uyu muyobozi  akomeza avuga ko ari abafana b’iyi kipe ndetse n’abakinnyi bose bifuza ko Luc agaruka.

Biteganyijwe kuwa gatatu tariki 13 Gicurasi Luc Eyamel, utarahiriwe n’akazi mu Rwanda, abonana  n’ubuyobozi bwa AFC  Leopards kubijyanye n’amasezerano ye mashya muri iyi kipe.

Paul NKURUNZIZA
ububiko.umusekehost.com