Tito Vilanova watozaga Barcelona FC yitabye Imana

Tito Vilanova watoza FC Barcelona mu mwaka ushize yitabye Imana kuri uyu wa gatanu ku myaka 45 yishwe na Cancer y’umuhogo.

Tito kuri uyu wa kane tariki 24 Mata nibwo yabazwe arembye cyane iyi cancer yamufashe mu mwaka wa 2011.

Yariho avurirwa muri Chiron Clinic i London ari naho yaguye.

Uyu mutoza byabaye ngombwa ko ava ku kazi ke mu mpeshyi ya 2013 ubwo iyi ndwara yari imurembeje yerekeza i New York kuyivuza.

Uyu mutoza nyuma gato yahise asimburwa na Tata Martino ari nawe ubu utoza FC Barcelona.

Vilanova ni kuva ari muto yazamukiye mu ishuri ry’umupira rya Barcelona ndetse aza gukina mu ikipe ya kabiri, Barcelona B mu bakinnyi bo hagati, nyuma agenda akinira amakipe nka Mallorca, celta Vigo n’izindi.

Kuva mu 2003 yinjiye mubyo gutoza, ajya muri FC Barcelona B yungirije Pep Guardiola, aba bombi baje guhabwa ikipe nkuru mu 2008 basimbura abaholandi Frank Rijkaard na Johan Neeskens wari umwungirije.

Bwa mbere ari muri iyi kipe nkuru, niyo ‘saison’ Barcelona yatwayemo ibikombe byinshi, ibikombe bitandatu bikomeye, nibwo Barcelona yabaye ikipe ya mbere yatwaye igikombe cya shampionat ikanatwara ibikombe bitatu ku mugabane w’uburayi.

Muri Mata 2012 Barcelona yemeje ko umutoza wayo Gualdiola yagiye kandi ko asimbuwe na Vilanova yahawe amasezerano y’imyaka ibiri mu kwa gatandatu 2012.

Mu Kuboza uwo mwaka ariko yararwaye amara ibyumweru bitandatu avurwa yarasimbuwe n’umwungiriza we Jordi Roura, Vilanova yagarutse kukazi muri Werurwe 2013 ariko yongera kuremba muri Nyakanga 2013 ndetse asezera kukazi atangira kwivuza.

Kuva mu cyumweru gishize nibwo yatangiye kumererwa nabi cyane, yitabye Imana kuri uyu wa 25 Mata.

Paul NKURUNZIZA
ububiko.umusekehost.com