Ba Miss, umwe arifuza ko Rayon igitwara, undi APR

Miss Rwanda Colombe Akiwacu yatangarije Umuseke ko byamushimisha cyane Rayon Sports iramutse itwaye igikombe cya shampionat uyu mwaka, ni nyuma gato y’uko uwo yasimbuye Mutesi Aurore abwiye Igihe ko we yakwishima ikipe ya APR FC itwaye igikombe, aya makipe akunzwe cyane arahatanira igikombe mu mikino ya shampionat ibiri gusa  isigaye.

Colombe Akiwacu, Miss Rwanda 2014 ubusanzwe ntakurikirana cyane Football, ndetse mu Rwanda avuga ko azi amakipe ya Mukura VS, APR na Rayon Sports akunda.

Uyu mukobwa avuga ko uyu mwaka Rayon Sports iramutse itwaye igikombe byamushimisha, nyamara ariko amahirwe yayo ni make kuko mukeba wayo APR FC irusha Rayon amanota abiri ikaba isabwa kudakora ikosa ryo gutsindwa imikino ibiri isigaye ubundi igashimisha abafana bayo barimo Miss Rwanda 2012 Mutesi Aurore.

Rayon Sports yabuze amahirwe yo kwegukana iki gikombe bwa kabiri yikurikiranya muri week end ishize ubwo yanganyaga na AS Kigali 1-1.

Rayon isigaje imikino ibiri isa n’iyoroshye aho izakina na Esperance (ya 12) kuri uyu wa gatandatu, ndetse na Musanze FC (ya 7) ku munsi wa nyuma wa Shampionat, amakipe yombi Rayon Sports ifite amahirwe yo gutsinda.

Kugirango Colombe Akiwacu Miss Rwanda 2014, we n’abafana benshi cyane ba Rayon Sports mu Rwanda babashe kwishima ni uko APR FC yatsikira mu mikino izakina na Espoir FC (ya 5) i Rusizi kuri uyu wa gatandatu, n’uwo izakina na AS Muhanga (ya 13) ku munsi wa nyuma. Bigasaba ariko ko na Rayon yaba yatsinze iriya mikino yayo yose isigaye.

Abafana ba Rayon bategeye cyane APR FC ku mukino izakina na Espoir FC y’umutoza Ruremesha kuri uyu wa gatandatu i Rusizi.  Espoir y’abakinnyi bazwi mu cyane mu minsi ishize nka nka Ntaganda Elias, Lomami André na Saidi Abed Makasi kapitaine wayo, yagiye igaragaza kwihagararaho cyane imbere y’ibihangange.

Iyi kipe ya Espoir ku munsi wa 2 wa shampionat yatsinze AS Kigali, ku munsi wa kane wa shampionat itsinda Kiyovu i Rusizi, ku munsi wa 12 Espoir yanganyije na APR 0 -0 i Kigali, ku munsi wa 13 itsinda Mukura, ku munsi wa 17 inganya na Kiyovu i Kigali, ku munsi wa 19 iyi Espoir yatsinze Rayon 2 – 1 iyisanze i Kigali, ku munsi wa 24 Espoir FC yatsinze Police iyisanze i Kigali (3-2), ibi byerekana ko ari ikipe yihagazeho imbere y’ibihangange muri iyi saison.

Espoir FC ubu iri ku mwanya wa gatanu, nayo ariko yagaragaje intege nke imbere y’amakipe nka Gicumbi, Muhanga na Musanze zagiye ziyitsinda ziyisanze i Rusizi, bamwe bakavuga ko byabaga byatewe no kwirara nyuma yo kwigaragaza nk’ikomeye ku makipe manini.

Nsengiyumva Albert Perezida w’ikipe ya Espoir FC yabwiye Umuseke ko biteguye cyane ikipe ya APR FC ndetse nta kabuza baza kuyitsinda kuri uyu wa gatandatu.

Nubwo hari habayemo ikibazo cy’ibirarane by’uduhimbazamusyi tw’abakinnyi bayo, Nsengiyumva avuga ko ubu bamaze kwibyishyura abakinnyi, kandi bamereye abakinnyi babo buri wese agahimbazamusyi ka 50 000Rwf (ubundi bahabwaga 30 000Rwf) nibaramuka batsinze APR FC.

APR FC ikundwa na Miss Rwanda 2012 Mutesi Aurore, yaraye igeze i Rusizi, bivugwa ko yanyuze inzira y’amazi yanga guca mu ishyamba rya Nyungwe, izi neza ko nta kosa yemerewe gukora kuko kunganya cyangwa gutsindwa byose biha amahirwe mukeba Rayon Sports yo kwegukana igikombe, Miss Rwanda 2014 nawe akishima.

Aya makipe yombi bisa n’aho ariyo mu Rwanda afite abafana benshi ndetse bahanganye cyane, nubwo aba Rayon baherutse kugaragaza imyitwarire mibi kuri stade ubwo banganyaga na AS Kigali.

Niba Miss Rwanda 2012 Mutesi Aurore yifuza ko APR FC icyegukana, Miss Rwanda 2014 Akiwacu Colombe akifuza ko Rayo igitwara, wowe urifuza ko ari iyihe igitwara?

APR FC iracyafite amahirwe kugeza ubu kuko mbere y’imikino ibiri isigaye irusha Rayon Sports amanota abiri.

Photos/Plaisir Muzogeye

Paul NKURUNZIZA
ububiko.umusekehost.com