Ikipe ya Esperance yihagazeho imbere ya As Kigali zigwa miswi

CHIEF EDITOR
04/24/2014

Ikipe ya AS Kigali imaze iminsi ihangamura ibihangange muri shampionat mu Rwanda, mu mukino w’ikirarane wakinwe kuri uyu wa gatatu tariki ya 23 Mata 2014 kuri sitade ya Mumena i Nyamirambo, ikipe ya Esperance yabashije guhagarara imbere yayo zirahatana birangira ziguye miswi igitego 1-1.

Abasore ba Esperance barwanira umupira na Murengezi Rodriguez wa AS Kigali uri hagati

Ni umukino utarabereye igihe kuko ikipe ya AS Kigali yari ihagarariye u Rwanda mu marushnwa nyafurika y’amakipe yabaye aya mbere iwayo (CAF Confederations Cup),wari umukino mwiza unogeye ijisho, amakipe yombi yakinaga ahererekanya udupira duto duto ariko akanyuzamo akanasatira kuri buri ruhande.

Ikipe ya As Kigali niyo yafunguye amazamu umukino ugitangira ku gitego cyiza cyatsinzwe na Niyonzima J.paul ku burangare bwa ba myugariro b’ikipe ya Esperance bari bahagaze nabi, nyuma yo gutsindwa igitego(Esperance) ariko ntiyigeze icika intege kuko byabaye nk’ibiyikanguye ikomeza gukina umupira wayo neza ariko noneho isatira.

Igice cya mbere kigana ku musozo ikipe ya Esperance yabashije kwishyura igitego bajya kuruhuka amakipe yombi anganya igitego 1-1.

Mu gice cya kabiri amakipe yombi ya komeje gusatirana, ikipe ya Esperance FC iza kubona igitego cya kabiri ariko umusifuzi wo ku ruhande aracyanga asifura ko bari baraririye.

As Kigali nayo yakomeje kugerageza kuba yashaka igitego cy’intsinzi ariko umuzamu wa Esperance FC Alphonse bakunze kwita Ndanda ababera ibamba. Umukino urinda urangira.

Casa Mbungo André utoza wa As Kigali asanga ikipe ye kuba itabashije gutsinda uy’umukino byatewe n’umunaniro ngo bamaranye iminsi bakina batahuruka .

Casa Mbungo yagize ati “Ntitubashije kubona amanota atatu uyu munsi, ariko namwe mwabonye ko As Kigali yakinaga uko idasanzwe ikina kubera ko abakinnyi banjye bananiwe, reba nawe twakinnye ku wa gatatu, ku wa gatandatu n’uyumunsi imikino itatu mu minsi itarenze irindwi.”

Camarade, umutoza wa Esperance FC we asanga ikipe ye yagerageje kuba yabashije kubona inota rimwe kuko bibafasha gukomeza kugira ikizere cyo kuguma mu kiciro cya mbere.

Camarade ati “Twagerageje abakinnyi banjye bakinnye neza, twatsinze igitego abasifuzi baracyanga ubwo nticyari igitego ariko igikuru ni uko tubonye inota rimwe.”

Ikipe ya Esperance FC iri kumwanya wa 12 na amanota 20 mu gihe ikipe ya As Kigali iri kumwanya wa 3 na manota 46.

Urutonde rw’agateganyo, hasigaye imikino ibiri shampionat ikarangira:

N^O	TEAM	PG	W	D	L	GF	GA	GD	PTS
1	APR	24	18	4	2	41	12	29	58
2	RAYON S.	24	18	2	4	51	22	29	56
3	AS KIGALI	23	13	6	3	29	15	14	46
4	POLICE	24	12	5	7	42	25	17	41
5	ESPOIR	24	10	8	6	24	19	5	38
6	KIYOVU S.	24	10	7	7	30	22	8	37
7	MUSANZE	24	10	7	7	27	26	1	37
8	MUKURA	23	7	4	11	23	24	-1	25
9	GICUMBI	24	6	6	12	20	28	-8	24
10	ETINCELLES	24	4	11	9	18	30	-12	23
11	MARINES	24	5	5	14	18	33	-15	20
12	ESPERANCE	24	5	5	14	18	34	-16	20
13	MUHANGA	24	4	6	14	18	45	-27	18
14	AMAGAJU	24	4	5	15	17	33	-16	17

Esperance ariko irasabwa gukora iyo bwabaga ngo itamanuka kuko ubu iri munsi y'umurongo w'izigomba kumanuka — Esperance ariko irasabwa gukora iyo bwabaga ngo itamanuka kuko ubu iri munsi y’umurongo w’izigomba kumanuka

Ikipe ya AS Kigali umutoza wayo avuga ko bari bananiwe kuko bakinnye imikino itatu mu minsi itarenze irindwi

Esperance yihagazeho cyane imbere ya AS Kigali imaze iminsi igora cyane ibihangange nka Rayon, APR na Police FC

Abasore b'ikipe ya Esperance bagerageje kugumana umupira — Abasore b’ikipe ya Esperance bagerageje kugumana umupira

Ikipe ya Esperance yabashije kwishyura igitego bari batsinzwe mbere y'uko igice cya mbere kirangira, aha bakishimiraga — Ikipe ya Esperance yabashije kwishyura igitego bari batsinzwe mbere y’uko igice cya mbere kirangira, aha bakishimiraga

Muri VIP yo kuri stade ya Mumene nta ntebe zari zihari, umutoza Richard Tardy wicaye imbere, hamwe na bamwe mu bayobozi inyuma ye, bari biyicariye hasi

Photos/P Nkurunziza

Paul NKURUNZIZA
ububiko.umusekehost.com

Share this: