AS Kigali yatangiye kwitwara neza, Gicumbi irarwana no kutamanuka

Ku mukino wa mbere w’ikirarane nyuma yo gusezererwa mu mikino nyafurika, AS Kigali yatsinze Gicumbi  ibitego 2-1, umukino waberaga kuri stade ya Kagali i Nyamirambo kuri uyu wa kane.

Ibitego bya AS Kigali byatsinzwe na Mwizerwa Amini, Uwimana Emmanuel byatsinzwe mu bice bibiri by’umukino kimwe mu cya mbere ikindi mu gice cya kabiri.

Igitego cya Gicumbi FC cyatsinzwe n’umunyecongo Banga Jemba Kalume bakunze kwita Nando ukinira Gicumbi.

Casambungo André utoza AS Kigali nyuma y’umukino yavuze  yavuze ko ikipe ye ishaka gutsinda imikino yose y’ibirarane isigaranye kugirango isatire amakipe ya mbere.

Ati “ ndacyahatanira igikombe kuko ndacyafite amahirwe, dufite imikino y’ibirarane ibiri tutarakina, tuzamenya neza uzatwara igikombe ku munsi wa nyuma wa shampiyona”.

Kayiranga Baptiste utoza wa Gicumbi FC we avuga ko  ntacyo baba batakoze nk’abatoza, gusa ko hari n’ibyo abakinnyi bagakwiye gukora mu kibuga.

Kayiranga akomeza avuga ko igice cya mbere kitabahiriye, ariko habayeho ikosa umusifuzi ntiyaribona bari guhabwa penaliti .

Kayiranga yagize ati “ Mu mikino ibiri dufite i Gicumbi n’ibiri hanze tuzagerageza gushyiramo imbaraga tubona amanota atwemerera kuguma mu cyiciro cya mbere.”

Ku rutonde rwa shampiyona, AS Kigali iri ku mwanya wa kane inganya amanota 41 na Police FC zirushwa amanota 11 na Rayon Sports na APR FC ziri imbere.

Shampiyona irakomeza mu mpera z’iki cyumweru hakinwa umunsi wa 23.

Kuwa Gatandatu

Marines vs Rayon Sports –Sitade Umuganda
Kiyovu Sports vs APR FC –Sitade ya Kigali
Amagaju vs Police FC –sitade ya Nyagisenyi
Musanze vs Mukura VS –Sitade Ubworoherane

Ku Cyumweru

Espoir vs -Rusizi
AS Muhanga vs Esperance –Sitade ya Muhanga
AS kigali vs Etincelles –Sitade ya Kigali

Damas Nkotanyi
ububiko.umusekehost.com