FERWAFA: Murindahabi Olivier niwe munyamabanga mushya

Murindahabi Olivier ni we watsindiye umwanya w’Umunyamabangu Mukuru w’ishyirahamwe ry’umupira w’amaguru mu Rwanda FERWAFA, nk’uko byatangajwe ku mugoroba wo kuri uyu wa gatatu tariki ya 12 Werurwe, 2014.

Uyu mugabo wabaye umunyamabanga mukuru wa Mukura Victory Sport aho yakoranaga na Nizeyimana Olivier, uzwi ku izina rya Olivier Volcano Perezida wa Mukura.

Murindahabi yahatanye kuri uyu mwanya w’Ubunyamabanga bwa FERWAFA na Gakwaya Olivier ndetse  na Karuhije Innocent, bose bifuza gusimbura Gasingwa Michael ucyuye igihe.

Mu manota y’ibizamini bakoze, Murindahabi wavuye muri Mukura VS yagize 91, Gakwaya wari wavuye muri Rayon Sports agira 62 na ho Karuhije utamenyerewe mu mupira w’amaguru agira amanota 44.

Uyu ni undi umuyobozi mushya muri FERWAFA uje gukorana na Perezida mushya Nzamwita Vincent de Gaule wasimbuye Ntagungira Celestin uzwi ku izina rya Abega.

FERWAFA iracyafite akazi kanini ko kubaka ikipe y’igihugu ikomeye, kubaka shampionat ikomeye (kuko ubu iri mu zanyuma ziri hasi ku isi nk’uko biherutse kugaragazwa na International Federation of Football History & Statistics (IFFHS)), ndetse cyane cyane no kubaka umupira w’amaguru mu bana ufatwa nk’inkingi yo gukomeza biriya bice bya mbere.

Jean Paul Nkurunziza
ububiko.umusekehost.com