Abanyarwanda bazi ikoranabuhanga rihanitse barakenewe ku isoko ry’umurimo

Abanyarwanda bakenewe ku isoko ry’umurimo mu bijyanye n’ ikoranabuhanga ryo ku rwego rwo hejuru baracyari benshi ari na yo mpamvu kuri uyu wa 7 Werurwe 2014 abasaga 25 bahawe impamyabumenyi y’amasomo ajyanye n’ikoranabuhanga ryo ku rwego rwo hejuru ‘Oracle Certified Associate’ zitangwa n’ikigo Victory Technology.

Aba banyeshuri bahawe impamyabumenyi mu kigo cya Victory Technology i Remera, bakaba bari basanzwe bafite ubumenyi mu ikoranabuhanga bityo bakaza kubwongera ngo bagere ku rwego mpuzamahanga.

Aya masomo y’inyongera ku bumenyi bw’aba banyeshuri babifashijwemo n’ikigo cy’igihugu cy’Iterambere (RDB).

Muri rusange iki kigo cya Victory Techonology kikaba kimaze gusohora abanyeshuri barenga 1000 aho muri bo abasaga 300 bafashijwe na RDB.

Bizimana Aimé uyobora ikigo ‘Victory Techonology’ avuga ko  ikoranabuhanga rya ‘Oracle’ ari ukwegeranya amakuru ku kintu.

Atanga urugero ku buryo bw’ikusanyamakuru ku muntu bikorwa n’ibigo nk’amabanki n’ibindi bitanga serivisi. Yagize ati “Nk’iyo ugiye muri Banki, EWSA usanga amakuru yawe n’aho ukomoka byegeranyije kandi wenda utarabitangiye ahantu hamwe.”

Bizimana avuga ko ku isoko ry’umurimo hari hakenewe Abanyarwanda kuko iri koranabuhanga rihanitse ibyaryo byajyaga bikorwa n’abanyamahanga.

Yongeraho ko Abanyarwanda badakwiye kugira impungenge ku ikoranabuhanga kuko ngo hari  abageze ku rwego rwo hejuru, bamwe batangiye kugira impamyabumenyi z’ikirenga ziri ku ruhando mpuzamahanga.

Na ho Ujeneza Elisabeth ukorera muri iki kigo ari na ho yize, avuga ko ‘Oracle’ ikoreshwa cyane mu bigo byose bikenera kwegeranya amakuru  ku bantu n’ibyabo gusa ngo hakaba hatari Abanyarwanda bahagije bafite ubumenyi muri aya masomo.

Muri aba bahuguwe mu gihe cy’ibyumweru bitandatu harimo abakozi ba Leta ndetse n’abantu bafite aho bahuriye n’ikoranabuhanga bafashijwe na RDB, 25 bahawe impamyabumenyi.

Ikigo cy’Igihugu cy’Iterambere (RDB) gifatanyije na Minisiteri y’Urubyiruko n’Iikoranabuhanga bakangurira cyane Abanyarwanda gutinyuka ikoranabuhanga ndetse  bakanatera inkunga aho bibaye ngombwa.

BIRORI Eric
ububiko.umusekehost.com