Bamwe mu baturage ba Ngororero barataka ubukene no kutagira amazi meza

Ubukene, kubura amazi meza n’ubuzima buhenze ni bimwe mu bibazo bamwe mu baturage batuye mu murenge wa Ngororero babwiye Umuseke ko bibabangamiye, basaba Leta kubegereza imishinga itanga akazi aho baba ngo kuko bo VUP bo itabagezeho.

Mu muganda wo kubakira bamwe mu banyarwanda birukanywe muri Tanzania bakaba barajyanwe gutuzwa mu karere ka Ngororero, uyu muganda wabaye kuwa kane tariki 6 Werurwe 2014, mu kagari ka Mugano, ari naho aba baturage baganiriye n’umunyamakuru w’Umuseke.

Bagwaneza Wensislas yabwiye avuga ko bafite ikibazo cy’ubukene, yemeza ko nta gafaranga babasha kubona kuko ngo nta biraka cyangwa imishinga ibaha akazi bakibona.

Yagize ati “Ubukene burahari, nta mushinga tugira twakoreramo amafaranga. Mutubwirire Leta na twe izatugezeho VUP kuko twebwe ntiyigeze itugeraho.”

Mugenzi we Ngirababyeyi Jean Paul, avuga ko bagira ikibazo cy’ibyiciro by’ubudehe bashyizwemo ngo bitajyanye n’ubushobozi bwabo.

Yemeza ko abaturage bangaga kwitwa amazina asebetse bakiyita abakene bifashije, ayo makuru akaba ari nayo yajyendeweho kugena ibyiciro by’ubwisungane mu kwivuza.

Yagize ati “Ubu kubona amafaranga y’ubwisungane mu kwivuza ni ikibazo gikomeye – ntaho dukura amafaranga.”

Undi mubyeyi we uvuga ko yabyaye abana 10, ariko batanu muri bo bakaba baragiye i Kigali gishaka imibereho, avuga ko kubonera abana be ubwisungane mu kwivuza bimuvuna cyane.

Kuri we ngo yabonye isomo ku buryo asaba abakiri bato kubyara abana bake nibura babiri.

Aba baturage bavuga ko aho batuye, ni mu misozi, nta mazi meza ahari ngo ayo bajya babona ni ayo mu tubande bita kano.

Iki kibazo kuri bo ngo gikwiye kwigirwa mu mwiherero ugiye guhuza abayobozi bakuru b’igihugu kuva kuri uyu wa gatandatu tariki 8 Werurwe, inama twasanze bazi neza ko ihari ndetse wumva ari abaturage basobanukiwe muri kuganira.

Aho mu murenge wa Ngororero, kg 1 y’ibishyimbo igurwa amafaranga 400 mu gihe ibigori bavuga ko bejeje kg 1 igurwa amafaranga 150.

Ibi bibazo abaturage bafite, Umuseke wabiganiriyeho na Mme Nyiraneza  Clotilde umuyobozi wungirije ushinzwe imibereho myiza y’abaturage mu karere.

Ku kibazo cy’uko mu murenge wa Ngororero hatageze VUP, Mme Nyiraneza avuga ko iyi gahunda yajyaga mu yindi mirenge hagendewe ku mirenge ikennye cyane, akemeza ko hari gahunda ya HIMO nayo ifasha abaturage kubona akazi bagakora ku ifaranga.

Ku bijya n’amazi meza, avuga iki ari ikibazo cyugarije Akarere muri rusange ko ariko abaturage bavoma muri za kano kandi ngo zikoze neza nubwo ayo mazi atabahagije kandi hari abayavana kure.

Umuyobozi wungirije w’akarere ka Ngororero kandi avuga ko ikibazo cy’uko hari abaturage bari mu byiciro by’ubudehe bashyizwemo kandi bidahuje n’ubushobozi bwabo, ari gahunda ya Leta ishobora kuzasubirwamo gusa ngo bategereje ko Leta ibabwira ngo batangire gusubiramo.

N’ubwo bamwe mu baturage ba Ngororero baba bafite ikibazo cy’ubukene, bavuga ko umutekano wabo urinzwe kandi ngo nabo ubwabo barawirindira. Ni kimwe mu byo bavuga ko bishimira.

Aka karere Ngororero gaherereye mu Ntara y’Uburengerazuba, gahana imbibi n’uturere twa Nyabihu, Gakenke, Rutsiro, Karongi na Muhanga. Igice kinini cy’aka karere kigizwe n’imisozi miremire cyane.

Mu murenge wa Ngororero hari ishuri PEGERWA n’ivuriro byose biri i Nyange. Uyu murenge kandi unyurwamo n’uruzi rwa Nyabarongo gusa abaturage bavuga ko kurya ifi kuri bo bitabaho ngo kuko banabujijwe kuroba muri uwo mugezi.

Ngororero igizwe n’imirenge 13 ari yo Bwira, Gatumba, Hindiro, Kabaya, Kageyo, Kavumu, Matyazo, Muhanda, Muhororo, Ndaro, Ngororero, Nyange na Sovu.

Photos/E Hatangimana

HATANGIMANA Ange Eric
ububiko.umusekehost.com