Nzitabira PGGSS V nimpabwa amahirwe – Knowless

Mu kiganiro n’abanyamakuru kuri uyu mugoroba wo kuwa mbere umuhanzikazi Butera Jeanne d’Arc, Knowless, yatangaje ko naramuka ahawe amahirwe azitabira irushanwa rya Primus Guma Guma Super Star ya gatanu nahabwa amahirwe. Ni nyuma yo gusezera muri iri rushanwa rigiye kuba ku nshuro ya kane.

Ku maso y’abari muri iki kiganiro, abanyamakuru n’abayobozi b’irushanwa ku ruhande rwa BRALIRWA na EAP,  nta wishimiye kuvamo kw’uyu muhanzi muri iri rushanwa ryari ritaratangira.

Knowless ati “uyu mwaka sinabasha gufatanya iri rushanwa n’akanzi kazi kenshi mfite. Ariko ndashimira abari bantoye ngo nitabire uyu mwaka.”

Knowless muri iki kiganiro yasabye abakunzi be gushyigikira abahanzi b’igitsina gore bari muri iri rushanwa.

Martine Gatabazi ushinzwe imitegurire y’iri rushanwa no kumenyekanisha ibikorwa byayo yavuze ko babajwe no kuba Knowless yasezeye muri iri rushanwa.

Ati “Twashimishijwe n’uko yitwaye umwaka ushize kandi yari mu bafite amahirwe muri uyu mwaka. Ariko nta kundi turifuriza abandi bakobwa bari mu irushanwa gutera ikirenge mucya Knowless.”

Umuhanzi uzasimbura Knowless ku rutonde rwa 15 batowe, ariko bazatorwamo 10 ba nyuma, azatangazwa mu minsi iri imbere nk’uko byatangajwe muri iyi nama.

Ngo hazagenderwa ku wari ufite amajwi menshi inyuma ya 15 bari batowe.

 Photos/Plaisir Muzogeye

Joel Rutaganda
ububiko.umusekehost.com