FERWAFA yatoye itegeko rihana uzasagarira abasifuzi

Ni nyuma y’aho bitangarijwe ko umutoza Camarade Banamwana yahagaritswe imikino umunani ariko hakaza kubura itego riteganya ibyo bihano.

Amakuru agera k’Umuseke aravuga ko ubuyozi bw’ishyirahamwe ry’umupira w’amaguru mu  Rwanda FERWAFA bwamaze kwicara bugatora itegeko rizajya rihana umutoza, umuyobozi, umukinnyi cyangwa umufana uzajya usagarira abasifuzi.

Iri tegeko riteganya ko, umutoza uzajya yandagaza umusifuzi azajya ahagarikwa imikino umunani adatoza ikipe ye n’ihazabu y’ibihumbi ijana(100,000 frw).

Umuyobozi w’ikipe uzajya ugaragaraho gusagarira umusifuzi azajya ahagarikwa imikino ine atajya aho ikipe ye yakiniye ndetse atange n’ihazabu y’amafaranga ibihumbi ijana(100,000 frw).

Naho umukinnyi uzajya  ugaragarwaho no guhutaza umusifuzi azajya ahanishwa kumara imikino itanu adakina ndetse akanatanga ibihumbi ijana by’ihazabu (100.000 frw).

Umutoza wa mbere umaze guhanwa ni Camarade Banamwana w’ikipe ya Esperance nyuma yaho ngo yaba yarashyize mu majwi umusifuzi wasifuriye ikipe ye ya Esperance ndetse n’ikipe ya Gicumbi.

Nkuko amakuru aturuka  mu ishyirahamwe ry’umupira w’amaguru mu Rwanda FERWAFA abitangaza, ngo ukurikiyeho guhanwa n’iri tegeko ni Sam SSimbwa utoza ikipe ya Police FC nyuma y’uko ku mukino wa muhuje n’ikipe ya Rayon Sports, Umutoza Ssimbwa yagaragaje kutanyurwa n’imisifurire avuga ko igitego cya Rayon bagitwererewe n’umusifuzi.

Ssimbwa yagize ati “Imisifurire mibi Ni icyorezo cy’ugarije umupira wo mu Rwanda, impano y’igitego umusifuzi yatanze cyaduciye intege kuko twashoboraga kwishyura ndetse tukanatsinda uy’umukino.”

Ssimbwa aramutse agonzwe n’iri tegeko, uwahoze ari umukinnyi vuba aha Mutarambirwa Djabili niwe  ushobora guhita atoza imikino  umunani isigaye ngo shampiyona ya 2013-2014 irangire.

Jean Paul Nkurunziza
ububiko.umusekehost.com