Nyuma y’u Rwanda, Kenya ihawe kwakira CHAN

Impuzamashyirahamwe y’umupira w’amaguru ku mugabane Afurika (CAF) kuri uyu wa 24 Gashyntare nimugoroba imaze gutangaza  ko Kenya ariyo izakira igikombe cy’Afurika cy’abakina imbere mu gihugu (CHAN) mu 2018 nyuma y’u Rwanda ruzacyakira  2016.

Mu itangazo CAF yashyize ku rubuga rwayo rigira riti “hangendewe ku byasabwaga birimo ibikorwa remezo, komite nyobozi ya CAF yahisemo ko CHAN ya 2018 izabera muri Kenya.”

ubuyobozi bw’Ishyirahamwe ry’umupira w’amaguru muri Kenya bwagaragaje ko bwishimiye uyu mwanzuro wa CAF, ku rubuga rwa Twitter ubuyobzi bw’umupira w’amaguru muri Kenya bwatangaje ko ari umwanya mwiza Kenya ibonye  wo kwiyerekana ku ruhando mpuzamahanga.

Iri rushanwa rya CHAN rihatanirwa n’amakipe y’ibihugu by’Africa ariko abakinnyi bayikina ni abakina imbere muri shampionat z’imbere mu bihugu byabo.

Ubu iri rushanwa rimaze gukinnwa inshuro eshatu guhera mu 2009,  cyegukanywe bwa mbere na Congo Kinshasa, Tuniziya mu 2011 na Libye yacyegukanye mu ntangiriro z’uyu mwaka mu irushanwa ryabereye muri Africa y’Epfo.

Mu 2016 iri rushanwa rizabera mu Rwanda, naho mu 2018 ribere muri Kenya nk’uko byemejwe none.

Ni irushanwa ryashyizweho rigamije kuzamura no kugaragaza kurushaho umupira w’abakinnyi bakina mu mashampionat y’imbere mu bihugu byabo, nyuma yo kubona ko irushanwa rya CAN ibihugu byarikoreshagamo cyane abakinnyi babyo bakina mu mashampionat akomeye i Burayi n’ahandi ab’imbere mu gihugu ntibabone amahirwe yo kugaragara.

Jean Paul Nkurunziza
ububiko.umusekehost.com