Rayon Sports yavanye APR FC ku mwanya wa mbere

By’agateganyo, Rayon Sports yafashe umwanya wa mbere kuri iki cyumweru nyuma yo gutsinda ikipe ya Police FC ibitego 2 -1 mu mukino wabereye kuri stade ya Kigali i Nyamirambo.

Uyu mukino wari umukino w’ikirarane w’umunsi wa 18 Rayon Sports itakinnye kuko yari mu mikino y’amakipe yabaye aya mbere iwayo muri Africa. Aho yaje gusezererwa na AC Leopard.

Ku mukino wa none amakipe yombi yakinnye umukino w’imbaraga cyane warangiye mu gice cya mbere zinganyije ubusa ku busa.

Mu gice cya kabiri, Djamar Mwiseneza niwe wafunguye amazamu asoga umupira wari ufashwe nabi n’umunyezamu wa Police FC Ganza Alexis ku ishoti yari atewe na Hamissi Cedrick.

Myuma y’iminotamicye, igitego cya kabiri cyo cyatsinzwe na Hamiss Cedric waciye mu rihumye ba myugariro ba Police FC mu gihe bari bibeshye ko yaraririye maze asigarana n’umuzamu ashyiramo icya kabiri.

Police FC yabashije kubona igitego cyatsinzwe na Fabrice Twagizimana kuri ‘corner’.

Police FC mu minota ya nyuma yasatiriye cyane ariko biranga umukino urangira itabonye amahirwe nibura yo kunganya na Rayon Sports

Nyuma y’uyu mukino Rayon Sports yahise ifata umwanya wa mbere by’agateganyo n’ubwo inganya amanota na APR FC bikanyuranywa n’umubare w’ibitego zizigamye.

Sam Ssimbwa utoza Police FC yagaragaje ko atigeze yishimira  imisifurire y’umusifuzi  Ishimwe Claude wari wasifuye uy’umukino dore ko ari nawe wari wasifuye ubanzahagati y’aya makipe, Police FC itsinda Rayon Sports ibitego 2-1.

Shampiyona igiye kuba ihagaze ibyumweru bibiri izasubukurwa italiki ya 8 Werurwe bitewe n’uko ikipe y’igihugu Amavubi agiye kwitegura umukino wa gicuti uzayihuza n’ ikipe y’igihugu y’u Burundi tariki ya 5 Werurwe 2014.

Jean Paul Nkurunziza
ububiko.umusekehost.com