Jose Chameleone agarutse kuririmbira i Kigali

Ubuyobozi bwa Mount Kenya ishami rya Kigali nibwo bwemeje ko bwatumiye uyu muhanzi ukomeye mu karere ngo azaze gutaramira abazitabira umuhango wa Miss Mt Kenya University tariki 1 Werurwe 2014.

Muri uyu muhango uzabera muri Expo Ground i Gikondo Dr Jose Chameleone ngo azaririmba ariko anakirwe n’abahanzi bakomeye hano mu Rwanda nka Riderman na Knowless.

Chameleone wamamaye muri aka karere aheruka mu Rwanda muri Nzeri 2013 aho yataramye mu gitaramo  Knowless yamurikaga Album ye, nubwo atigeze ashimisha abari aho nk’uko bari babyiteze.

Purity Phuo uri gutegura ibi birori byo kuwa 1 Werurwe yabwiye NewTimes ko batumiye uyu muhanzi ngo bashimishe cyane cyane abanyeshuri babo mu gihe bazaba banishimira Nyampinga mushya wa Kaminuza yabo.

Abahungu 10 n’abakobwa 10 ngo nibo bari guhatanira amakamba ya Nyampinga na Rudasumbwa ba kaminuza ya Mt Kenya ishami rya Kigali.

Iyo gahunda yo kuwa mbere Werurwe kwinjira bizaba ari amafaranga 1 500 ku munyeshuri, 3 000Frw ku batari abanyeshuri na 5 000Frw mu myanya y’icyubahiro.

Photo/Plaisir MUZOGEYE

ububiko.umusekehost.com