Rayon Sports yatsinze Amagaju FC, ubu irasatira APR FC

Kuri uyu wa gatatu ku mukino w’ikirarane cy’umunsi wa 17 cya Rayon Sports, yari yakiriye Amagaju FC y’i Nyamagabe kuri stade ya Kigali aho iyatsinze ibitego bibiri ku busa mu mukino Rayon Sports yagaragajemo imbaraga kurusha Amagaju.

Rayon Sports ikiri mu gikomere cyo gusezererwa mu gikombe cya Africa cy’amakipe yabaye aya mbere iwayo, yongeye kwigaragariza abafana bayo b’i Kigali nk’ikipe ikomeye.

Mu gice cya mbere cy’uyu mukino amakipe yombi yihagazeho, Amagaju agasatira na Rayon igasatira. Gusa uko iminota yagiye itambuka Rayon Sports yagiye irusha imbaraga Amagaju.

Kuri uyu mukino w’aya makipe yombi yo mu majyepfo hari abafana bagereranyije.

Ku munota wa 43 mbere gato y’uko igice cya mbere kirangira Kagere Meddie yatsinze igitego cya mbere cya Rayon Sports bajya kuruhuka ari uko bihagaze.

Mu gice cya kabiri Rayon Sports yakomeje umuvuduko yari imaze kujyaho mu gice cya mbere maze ku munota wa karindwi gusa w’igice cya kabiri Hamiss Cedric nanone atsinda igitego cya kabiri.

Amagaju yakomeje kugerageza kureba icyo abona ariko biranga kuko Rayon Sports yari iriho kuyirusha imbaraga bigaragara.

Gusa iyi kipe y’i Nyamagabe yakomeje kwihagararaho ntiyinjizwa ibindi bitego kugera umukino urangiye.

Amakipe yombi kuri uyu mukino yagaragaje kwinubira cyane imisifurire ku mukino wa none.

Rayon Sports nyuma yo gutsinda uyu mukino yahise isatira mukeba wayo APR FC iri ku mwanya wa mbere.

Ku rutonde rw’agateganyo Rayon Sports ubu ifite amanota 40 mu mikino 17, mu gihe APR FC ifite amanota 43 mu mikino 18.

Rayon ifite undi mukino w’ikirarane izakina na Police FC ku cyumweru tariki 23 Gashyantare 2014.

Urutonde rw’agateganyo:

Photos/Plaisir Muzogeye

Roger M Rutindukanamurego/Damas Nkotanyi
ububiko.umusekehost.com