Umukobwa Angelique, ari kuba inzobere mu gukora amatara y’imodoka

Umukobwa Angelique we na bagenzi be Nsabimana Callixte na Niyonzima Denise ni bamwe mu rubyiruko bahisemo kwiga imyuga inyuranye muri IPRC-West, bageze mu mwaka wa gatandatu mu mashami y’ubukanishi n’ikoranabuhanga rya electronique, bavuga ko bazigeza kuri byinshi ariko Umukobwa we yemeza abanyarwanda benshi cyane bazatunga imodoka, ariko we iye ngo azajya ayikorera.

Nk’uko babigaragarije abantu benshi bari bitabiriye imurikabikorwa ry’ikigo bigaho ryabaye tariki 14 Gashyantare, uru rubyiruko rwerekanye ko hari byinshi rwakora binyuze mu ikoranabuhanga bigahindura imibereho y’Abanyarwanda.

Umukobwa yerekanye ubuhanga bwe mu gukora amatara y’imodoka, ndetse avuga ko ubukanishi yiga bugezweho, ngo bitewe n’iterambere ririho asanga buri mu Nyarwanda azatunga imodoka bityo na we iye ngo azajya ayikorera.

Mu kiganiro cyihariye yagiranye n’Umuseke, Umukobwa yagize ati “Ubukanishi nasanze ari wo murimo unogeye hanze aha mu buryo bwo kwihangira umurimo. Kujya munsi y’imodoka nkanika ndabikunda cyane.”

Uretse gukunda uyu mwuga, Angelique Umukobwa afite icyizere cy’ejo hazaza ku iterambere ry’Abanyarwanda, akaba yaragize ati “U Rwanda ruratera imbere mu minsi mike buri wese azaba afite imodoka, na njye nzayigira bityo aho nzajya ikampfiraho nzayikorera.”

Gutinyuka ngo ni kimwe mu byafasha urubyiruko rw’abakobwa kwitabira umuriro ndetse yemeza ko nta cyo umukobwa atashobora yabishatse.

Nsabimana Callixte na we witabiriye gushakira ejo hazaza mu ikoranabuhanga, ni we na Niyonzima Denise beretse abantu ko umuntu yakwatsa amatara cyangwa akayazimya akoresheje amashyi y’ibiganza bye, ndetse berekanye ko mu Rwanda ikoranabuhanga rigeze ku yindi ntera.

Bombi bavuga ko ibyo biga bizabafasha guhanga imirimo kandi ngo nibarangiza kwiga ubumenyi bwabo ntibuzapfa ubusa.

Nsabimana yagize ati “Ibi nkora hano, n’ahandi najya mu buzima busanzwe mfite ibikoresho nabikora.”

Ishuri IPRC-West riherereye mu mujyi wa Karongi, ryakira buri wese bifuza kwiga imyuga ishingiye ku ikoranabuhanga n’ubumenyingiro, rikaba rinafite ibikoresho bigezweho bisuzuma ubuziranenge bw’imodoka.

Photos/AE Hatangimana

HATANGIMANA Ange Eric
ububiko.umusekehost.com