RDB na ‘Trade Mark East Africa’ bumvikanye ku kuzamura ishoramari

Umuyobozi w’ikigo cy’igihugu cy’Iterambere RDB, Velentine Rugwabiza yizeye ko amasezerano yasinyanye na Sosiyeti igamije guteza imbere ubucuruzi ‘Trade Mark East Africa’ azafasha kongera ibyoherezwa mu mahanga nk’uko yabitangaje kuri uyu wa mbere tariki ya 10 Gashyantare.

Trade Mark East Africa ni umuryango ukorera mu bihugu byo mu karere k’Uburasirazuba washinzwe mu rwego rwo kuzamura ubukungu n’iterambere ry’ubucuruzi  harimo gushaka amasoko, kuzamura ubuhahirane n’ibindi.

Nk’uko Amb. Rugwabiza Velentine umuyobozi wa RDB abisobanura ngo gusinya amasezerano n’iyi sosiyeti bizongera umubare w’abohereza ibintu mu mahanga kuko ubu ibyinjizwa bikubye inshuro nyinshi ibyoherezwa.

Ati “Ubu tugiye gushyira ingufu mu bikorera kuko ari bo bazongera umubare w’abohereza ibintu mu mahanga, … abagera kuri 65 ni bo bohereza ibicuruzwa bifite agaciro ka Miliyoni y’amadorali.”

Amb. Rugwabiza akomeza avuga ko iyi Sosiyeti izafatanya n’u Rwanda kwinjira mu buzima bw’amakompanyi yo mu Rwanda bakareba ibibazo bahura na byo maze bagafatanya gushaka ibisubizo cyane ko bimwe na bimwe bizwi.

Muri byo hari amasoko akiri make, kubona ibyangombwa ndetse n’imyumvire ikiri hasi n’amakuru adahagije.

Bamwe mu bikorera bitabiriye iyi gahunda bavuze ko bagihura n’imbogamizi nyinshi, zirimo imyumvire y’Abanyarwanda batumva neza akamaro k’iby’iwabo, kutamenya amakuru ahagije yo mu bindi bihugu ndetse n’amatike y’indege akiri hejuru mu bihugu bituranye n’u Rwanda.

Amasezerano yasinywe hagati y’Umuyobozi wa RDB Ambasaderi Rugwabiza Velentine na Mark Priestly uyobora Trade Mark Rwanda, ishami ry’iyo sosiyeti twavuze rikorera mu Rwanda.

BIRORI Eric
ububiko.umusekehost.com