Mu muganda, abatuye i Mageragere bijejwe amazi vuba

Mu muganda wo kuri uyu wa 25 Mutarama 2014 Inama Njyanama y’Umujyi wa Kigali yakoranye umuganda n’abatuye Umurenge wa Mageragere aho washojwe abatuye uyu murenge bijejwe ko ikibazo cy’amazi bari bafite kizarangira vuba, ndetse bemererwa n’aba bayobozi kujya bakorera ubuvugizi abatuye uyu murenge.

Nyuma y’umuganda mu nama, abaturage bashimye abayobozi b’Umujyi wa Kigali kuba baje gukorana umuganda nabo, bababwira ko bishimiye kandi kuba hari ibikorwa remezo byabagezeho nk’umuhanda, amashanyarazi, ikigo nderabuzima ndetse na gahunda y’imiturire myiza.

Aba baturage ariko basabye ubuyobozi bw’umujyi kureba uko bubagezaho n’amazi meza, za tagisi (Taxis) zigera iwabo ndetse basaba ko banagezwaho gahunda ya Tunga TV bumvise ahandi.

Dr Sebashongore Dieudonne  umuyobozi w’Inama Njyanama y’Umujyi wa Kigali nyuma yo kumva abaturage  yababwiye ko agiye kuganira n’ubuyobozi bw’Umujyi kugirango ibyo basabye bizabagereho vuba.

Ku kibazo cy’amazi, Dr Sebashongore yabwiye abaturage ko yebwiwe n’Ubuyobozi bw’Akarere ka Nyarugenge ko amazi azaba yabagezeho mu gihe cya vuba.

Muri uyu muganda mu murenge wa Mageragere, hatewe urutoki rwa kijyambere mu murima w’umuturage witwa Ndacyayisenga Beata ku buso bwa hegitari eshatu

Uyu muturage mu byishimo byinshi yavuze ko urutoki bamutereye yiteguye kurukorera rukazatanga umusaruro munini akanagemurira amasoko.

Ndacyayisenga, akaba ariko yaboneyeho umwanya wo gusaba ko yahabwa inka muri gahunda ya “Gira inka” kugirango abone ifumbire yo gushyira mu rutoki yaterewe.

Emmanuel Rutubuka, umunyamabanga-nshingwabikorwa w’Umurenge wa Mageragere nawe akaba yashimangiye ko Umurenge ayoboye ufite gahunda yo kuzamura umusaruro mu buhinzi ugakomeza kugemurira amasoko y’Umujyi wa Kigali kurushaho.

Abagize Inama njyanama y’Umujyi wa Kigali nyuma y’uyu muganda, basuye umudamu witwa Muhimpundu Trifina wari umushoferi utwara amakamyo, ubu akaba yarahinze urutoki rwa kijyambere kuri hegitari enye (4) akaba ateganya kurusaruramo amafranga agera kuri miliyoni 15 ku mwaka.

ububiko.umusekehost.com