Uhawe inka ubu, ngo ntagikura ubwatsi

Ni umuco mu Rwanda guhana inka, kera bwo barananywanaga. Guhana inka cyari ikimenyetso cy’uko uyitanze yishimiye cyane uwo ayihaye, uyihawe nawe akazikora akajya gukura ubwatsi agacyura inka ye, kikaba igihango cy’ubucuti. Muri iki gihe byabaye nk’urwenya, n’uwo bayihaye ntiyirirwa ajya gukura ubwatsi.

Kera uwahabwaga inka, yiteguraga kujya gukura ubwatsi, yagerayo bakavuga imisango, bakavuga amazina y’inka, inzoga nziza zikanyobwa, bagatarama bigatinda maze uwahawe inka akayirongoora akayicyura.

Uyu munsi, uzumva mu biriro guhana inka byarabaye nk’ibisanzwe, ariko zikaba inka zo mu magambo, ku buryo abazihawe batirirwa bajya gukura ubwatsi.

Impamvu zitangwa kuri uku guca intege umuco nyarwanda ni;

*Inka yari ikimenyetso cy’umubano kandi zitunzwe cyane, ubu ngo inka z’inyarwanda ni nke cyane kandi abazitunze ni bacye bakwirekura imfurizone (inka y’inzungu) ngo ayihe umuntu. Inyana yayo nayo ngo iba ari iy’igiciro ku buryo buri wese adapfa kuyigaba uko abonye.

*Inka ariko kandi ubu usibye kuba ubutunzi ni umuzigo ukomeye ku miryango myinshi cyane y’abanyarwanda badafite aho bororera kuko umubare w’abanyarwanda wiyongereye cyane ariko ubutaka baragiraho bukiri bwabundi.

Kubera izi mbogamizi ebyiri zikomeye, ahanini ngo abanyarwanda benshi guhana inka basigaye babivuga byo kwishimirana gusa, ndetse ngo hari ubwo n’uwayihawe by’ukuri atirirwa ajya gukura ubwatsi kubera iriya mpamvu ya kabiri.

Haracyari ikizere ko uyu muco utazazima

Umugabo witwa Muganga Rutangarwamaboko akaba umuyobozi mu kigo Nyarwanda cy’ubuzima bushingiye ku muco mu mpera z’icyumweru gishize yarigabye n’abe, yerekeza  mu karere ka Kamonyi aho avuka ahitwa mu Bibungo bya Mukinga, agiye gukura ubwatsi.

Byegenze bite rero!

Umugabo Rutangarwamaboko yari agiye gukura ubwatsi k’umusaza Rwenderanya Pawulo wamugabiye inka, mu muhango w’uje umuco na gakondo y’u Rwanda, aba basaza bakumbuje uyu muco mwiza wacu.

Ubwo Rutangarwamaboko n’abari bamuherekeje bari basesekaye mu Bibungo bya Mukinga berekeje ku rugo rw’umusaza Rwenderanya, batura inzoga n’andi maturo bari bagendanye bahabwa ikaze mu bwuzu bwinshi no mu ndamukanyo zigira ziti “ Amashyo”, “Gira abana”, “Gira umugore” n’izindi zabwirwaga abashyitsi.

Baricaye babicira inyota maze umugabo Rutangarwamaboko araterura ati “ Turagenzwa no gushimira Rwenderanya watugabiye inka, tumushimira urukundo n’igihango dusanzwe dufitanye.”

Nyuma yo gushimira, umusaza Rwenderanya yasabye kujya gucanira maze ngo abamurikire inka yagabiye Rutangarwamaboko nk’uko  mu muco wa Kinyarwanda  byagendaga, umuryango wa Rutangarwamaboko urabyemera urasezera urataha ujya gutegura icyo gicaniro.

Umuryango wa Rutangarwamaboko umaze gutunganya igicaniro, umusaza Rwenderanya Pawulo n’abatahira be ndetse n’abo mu muryango we bazanye inka bagabiye Rutangarwamaboko kugirango bazimurikire umuryango ndetse bazimushyikirize zisange izindi zo muri uwo muryango.

Inka zirakirwa, imisango iravuga, igitaramo kiraba, zivugirwa amahamba n’amazina,  kuburyo bakumbuje abantu umuco wa kera wo gukura ubwatsi ndetse banashishikariza abantu bari batumiwe muri uwo muhango ko umuco nk’uyu utagomba gucika mu rwagasabo.

Rutangarwamaboko wagabiwe inka agakura ubwatsi yabwiye Umuseke ko igikorwa nk’iki gituma abanyarwanda bongera gukumbura, gukangukira no gusigasira imigenzo yarangaga umuco nyarwanda kugirango itazazima.

Ati “ Umuryango udafite umuco urazima, hari abakuru bagihari tugomba kubakomeraho bakazasiga imigenzo nk’iyi ikibukwa kandi igikorwa mu Rwanda.”

Umusaza Rwenderanya wahaye inka umugabo Rutangarwamaboko we yabwiye Umuseke ko gutanga inka nk’ikimenyetso cy’umubano, urukundo n’igihango bikwiye kuguma mu muco w’abanyarwanda.

Nubwo uyu musaza azi neza imbogamizi ubu ihari mu bijyanye n’ubworozi bw’inka n’ubuke bwazo, ariko avuga ko gutanga atari inka gusa ariko kandi n’ufite inka akabona uwo yayigabira ashobora kuyorora adakwiye kwiganyira kumugabira mu gihe ari inshuti ikomeye koko.

Ati “Si ngombwa kubeshya umuntu inka, wamuha ikindi ushoboye kuko icya ngombwa si inka icy’ingenzi ni ikimenyetso cy’igihango n’urukundo. Ku bafite inka birakwiye ko bagabirana ndetse byanashoboka bakagabira abatazifite ngo nabo babashe korora nk’uko Perezida Kagame yagabiye abanyarwanda benshi ubu bakaba nabo borozanya.”

Umuco ni ikintu gikomeye nk’uko aba bakuru babivuga, imigenzo nk’iyi yo kugabirana no gukura ubwatsi ngo ntabwo iba igomba kuzima ahubwo yakorwa mu buryo bundi bushoboka kuko uko igirwa urwenya ngo niko iba igana ku kuzima.

Photo/ Muzogeye Plaisir

Roger Marc Rutindukanamurego
ububiko.umusekehost.com