Bamwe mu bakobwa bagize uruhare mu kurema u Rwanda

U Rwanda uko rumeze ubu no kuba rugihari rumaze imyaka irenga igihumbi, si ku bw’abagabo cyangwa abana b’abahungu gusa batumye ruba igihugu gikomeye ntikizime nk’ibindi bihugu byari bigikikije.

Ni byo abagabo n’abahungu babigizemo uruhare runini ariko hari uruhare rwagizwe na bashiki babo rudakunze kuvugwa ni yo mpamvu twifuje kuvuga bamwe muri abo bakobwa batanze umusanzu ugaragara mu kurema u Rwanda tubona uyu munsi.

Robwa

Uyu mukobwa aza ku mwanya wa mbere bitewe n’uko yemeye gupfa nk’umutabazi abandi bagabo banze. Akaba yari mushiki wa Ruganzu I Bwimba bombi bapfuye batabaye mu Gisaka ho muri Kibungo (aka gace kataraba intara y’u Rwanda). Umwami w’i Gisaka yasabye uyu mukobwa agira ngo azamubyarire umwana w’umuhungu wari kuzatsinda u Rwanda kuko icyo gihe bemeraga ko nta bwami bwahangana n’amaraso yabwo ni ukuvuga n’umuntu ubakomokamo.

Musaza we Ruganzu I Bwimba yemeye kumushyingira abitewe na nyina wabishakaga cyane gusa abwira mushiki we ko niyumva yapfuye nk’umutabazi i Gisaka na we agomba kuzahita yiyahura ntabyare umwana wari kuzatsinda igihugu cye. Ni ko byagenze rero yumvise musaza we yapfuye na we ahita yiyahura atwite kandi yashoboraga kubyanga.

Nyabunyana

Uyu yari nyirasenge wa Ruganzu II Ndoli akaba yari yarashyingiwe umwami w’i Karagwe muri Tanzania,  mu gihe mu Rwanda byari bimeze nabi barasubiranyemo, musaza we Ndahiro II Cyamatare yohereje Ndoli kwa Nyabunyana amuhungishije. Yageze yo Nyabunyana amurinda ababaga bashaka kumwica, amuha uburere bwamukundishaga igihugu cye, amufasha muri byose kugeza atashye.

Iyo aza kuba umupfapfa ntiyari kumwitaho kuko yari yarashyingiwe hanze ntacyo abaye yashoboraga no kumubuza gutaha ngo atazagwayo, ariko si ko yabigenje yagumye kugirira igihugu cye akamaro ari hanze yacyo.

Nyirarumaga

Uyu akunze kwitwa “umunyabwenge” ku bw’ubwenge yunguye abasizi b’icyo gihe.

Uyu mukobwa yaje kwitegereza asanga u Rwanda rwaraburaga uburyo buhamye bwo kubika amateka yarwo ntiyibagirane kuko mbere y’icyo gihe hari ibyari byaribagiranye kubera kutabifata neza. Aza rero guhimba ubwoko bw’ibisigo byitwa “impakanizi” aho umusizi yapfundikaga ipfundo uko arangije kuvuga iby’ingoma imwe bigakomeza gutyo ayo mapfundo akamufasha kwibuka umubare w’ingoma.

Mbere abasizi bahimbaga igisigo kimwe cya buri ngoma bikaba ibisigo byinshi bitandukanye ariko we yazanye uburyo bwo kubibumbira hamwe byose mu gisigo kimwe. Abasizi bagiraga ibihe baza kuvuga ibyo bisigo ibwami ngo bumve niba ntacyahinduwemo.

Abo bakaba ari bamwe mu bakobwa benshi bagiye bagirira igihugu akamaro hari n’abandi benshi bagiye bemera gushyingirwa mu banzi b’u Rwanda, bityo bagafasha u Rwanda kubatsinda, hari abayoboye ingamba ni benshi Tuzagenda tubavugaho.

Hari igihe u Rwanda rwagiye ruyoborwa n’abagore mu gihe abana babo bari batarakura ngo biyoborere. Nko mu ntangiriro z’ingoma ya Musinga, iya Rwabugili, iya Rwogera, iya Gahindiro…

Abanyarwanda rero bamye bazi uruhare n’akamaro k’abakobwa ntibigeze babakandamiza nk’uko ahandi byari bimeze cyangwa ahenshi na henshi  bikimeze, n’ impamvu uburenganzira bw’abagore bwateye imbere ni uko byari ibintu bisanzwe mu muryango mugari w’Abanyarwanda ntibyasabye kubyigisha cyane nk’ahandi ku isi.

Wikirwanda

Roger Marc Rutindukanamurego
ububiko.umusekehost.com