AC Milan yirukanye umutoza Massimiliano Allegri

Ikipe ya AC Milan ikina mu cyiciro cya mbere mu gihugu cy’Ubutaliyani, yamaze kwemeza ko yirukanye umutoza wayo Massimiliano Allegri nyuma yo kwandagazwa n’agakipe kazanutse mu cyiciro cya mbere kitwa Sassuolo, katsinze icyo kigugu ibitego 4-3 ku cyumweru.

Umutoza Allegri yari aherutse gutangaza ko azava muri AC Milan nyuma y’isozwa rya Shampiyona muri uyu mwaka wa 2013-14, ariko ikipe ye ntiyashimye ko yakomeza kuyitoza.

AC Milan, imwe mu makipe y’ibigugu ku isi, iri ku mwanya wa 11 muri Shampiyona yo mu gihugu cy’Ubutaliyani Serie A, aho yibitseho amanota 22 mu mikino 19, ikaba yaratsinze imikino itanu gusa mu gice cya mbere cya shampiyona, ari na byo byatumye Allegri yirukanwa.

Massimiliano w’imyaka 46 yafashe AC Milan mu ki ry’umwaka wa 2010 ndetse aza guhita ayigeza ku gikombe ubwo yari akimara kuyifata.

Nyuma ya ho ikipe ya Milan yabaga iya kabiri, ariko ikimara kugurisha abakinnyi Zlatan Ibrahimovic na Thiago Silva mu ikipe ya Paris Saint-Germain, iyi kipe yasubiye inyuma ku buryo bugaragara.

Uku gusubira inyuma ku ikipe ya AC Milan kwasaga n’ugukabije muri uyu mwaka w’imikino 2013-14 aho noneho ku rwanira igikombe kuri iyi ikipe byasimbuwe no kurwanira kudasubira mu cyiciro cya kabiri.

Umutoza Allegri yavikiye mu mujyi wa Livorno, akaba yaratoje amakipe menshi yo mu Butaliyani nka Aglianese, SPAL, Grosseto, Lecco, Sassuolo na Cagliari.

Goal.com

ububiko.umusekehost.com